Kush po i lëshon alarmet e rrejshme për bombë?

Rastet kur njësisë K9 të Policisë së Kosovës i është dashur të dalin në terren për shkak të alarmeve për bombë, nuk janë të rralla.

Aeroportit i Prishtinës “Adem Jashari”, stacioni i autobusëve e Rektorati i Universitetit Publik “Hasan Prishtina”, u kërcënuan disa herë me mjete shpërthyese, por të cilat dolën të rrejshme.

E, këto kërcënime, sipas ekspertit të sigurisë, Fatmir Çollaku, krijojnë pasiguri tek qytetarët.

Prandaj ai ka një kërkesë ndaj institucioneve të sigurisë.

“Ndikon negativisht tek qytetaret sepse perceptohet si një gjendje jo e mirë tek qytetarët, gjegjësisht perceptohet një pasiguri e çastit. Prandaj sistemi i sigurisë dhe tërë shoqëria duhet të ndikojë, punojë dhe te mobilizohet që më pas sa më pak përpjekje të tilla, sepse ka të bëjë më një luftë speciale e përhapjes së frikës tek qytetarët”, ka thënë Çollaku për tëvë1.

Lexo po ashtu Alarm për bombë në Aeroportin e Prishtinës

Sipas Çollakut, në shumicën e rasteve, këto kërcënime vijnë nga Serbia.

“Në shumicën absolute kërcënime serioze por edhe lufta psikologjike ka një adresë ajo është Serbia, pra vijnë nga Serbia përmes mekanizmave të ndryshëm përmes njerëzve që ata kanë, në kuptimin që punojnë për shtetin serb, të cilët paguhen edhe për informata të rrejshme edhe për luftë psikologjike”, thotë ai.

Eksperti i kibernetikës, Mentor Hoxhaj vlerëson se këto raste nuk po trajtohen në mënyrë profesionale.

“Kjo është një shikim i ngushtë i situatës, prisja të kemi një reagim me profesional, për të mos pasur një të njëjtin reagim. Trajtimi i këtij rasti do të duhej të bëhej nga një grup profesional i formuar më herët, i cili do të quhej grupi për menaxhimin e incidenteve”, thotë Hoxhaj.

Të martën ishte rasti i fundit kur në Aeroportin e Prishtinës u alarmua që brenda objektit ishte një mjet shpërthyes, por që rezultoi të jetë i rremë.