Kryetari i PDK-së, Memli Krasniqi në një konferencë për media ka bërë të ditur se është ezauruar mundësia e shpërndarjes së Kuvendit.
Krasniqi tha se propozimi i PDK-së për shpërndarjen e Kuvendit nuk ka marrë mbështetjen e duhur.
“Sot më 29 maj ashtu siç e kam cekur si afat në letrën që u kam dërguar tre liderëve politik, duke ndjerë keqardhje ju njoftoj se mundësia për shpërndarjen e Kuvendit tashmë është ezauruar. Thirrja e PDK-së për koordinim mes partive më të mëdha politike në vend që të shpërndajmë Kuvendin nuk ka gjetur mbështetjen e mjaftueshme. Jam i habitur nga mosgatishmëria e partive opozitare për të mos ta bërë një gjë të tillë”, tha Krasniqi.
Ai shtoi se PDK javëve të fundit ka pasur një angazhim të shtuar për ta dërguar vendin në zgjedhje të parakohshme përmes shpërndarjes së Kuvendit me qëllim të vetëm për t’ia shkurtuar mandatin kësaj qeverie.
Krasniqi tha se angazhimi i tyre konkret dhe i sinqertë ka ardhur si rrjedhojë e stagnimit të shtetit tonë në të gjitha sferat.
“PDK e ka konsideruar se zgjidhja më e mirë janë zgjedhjet e parakohshme dhe në këtë mënyrë qytetarët do të vendosnin se çfarë kahje do të marrë shteti ynë. Unë e pranova ftesën e kryeministrit duke e bërë të qartë se PDK takohet vetëm për të caktuar datën e zgjedhjeve të reja. Ne propozuam 30 qershorin dhe 7 korrikun si data për zgjedhjet e parakohshme”, tha Krasniqi.
Ai shtoi se për fat të keq kolegët nga partitë opozitare nuk ishin të gatshëm si PDK-ja.
“Refuzimi për të shkuar në zgjedhje të parakohshme për mua mbetet befasues. Nuk dëshiroj të spekulojë a janë ta papërgatitura partitë tjera opozitare, apo kanë nevojë për më shumë kohë por nuk më kujtohet ndonjë rast tjetër në historinë e demokracisë parlamentare ku qeveria thotë ejani të shkojmë në zgjedhje jam e gatshme e opozita thotë jo vazhdojeni mandatin deri në fund. Këtë nuk mund ta kuptoj”, tha Krasniqi. /Telegrafi/