Komuna e Prizrenit thërret nevojtarët që të aplikojnë për furnizim me material ndërtimor

Komuna e Prizrenit të martën i ka bërë thirrje familjeve nevojtare që të aplikojnë për furnizim me material ndërtimor për ndërtimin apo renovimin e shtëpive të tyre. Ky projekt, sipas njoftimit të Komunës, ka për qëllim t’i mbështesë familjet në nevojë sociale, shtëpitë e të cilave janë të dëmtuara nga vjetërsia.

“Ftohen të gjithë qytetarët e Komunës së Prizrenit që të aplikojnë për projektin “Furnizim me material ndërtimor për ndërtimin/renovimin e shtëpive të rasteve skamnore dhe në vështirësi ekonomike” të cilin e realizon Drejtoria e Punës dhe Mirëqenies Sociale”, thuhet në komunikatë, raporton Telegrafi.

Aty gjithashtu luten të gjithë të interesuarit që ta plotësojnë pyetësorin si dhe ti mbledhin dokumentet që vërtetojnë statusin e tyre të banimit.

“Pyetësori i plotësuar dhe dokumentacioni i nevojshëm duhet të dorëzohen në sportelet e administratës komunale prej 19.08.2024 deri më 20.09.2024. Ky projekt është një mundësi për të kontribuar së bashku për një jetë më të mirë të qytetarëve të Komunës së Prizrenit”, thuhet në njoftim.

Lidhur me kërkesat eventuale për informata shtesë palët janë udhëzuar që të kontaktojnë me Drejtorinë e Punës dhe Mirëqenies Sociale të Komunës së Prizrenit. /Telegrafi/