Kështu folën zyrtarët e BDI-së në Tetovë para forumit të gruas (Video)

Bashkimi Demokratik për Integrim dje ka mbajtur një tubim me Forumin e Gruas ku është folur për situatën politike dhe rolin e gruas në shoqëri, përcjell Telegrafi Maqedoni.

Ali Ahmeti, kryetar i kësaj partie ka thënë ”Shtylla e qëndrueshmërisë sonë është nëna shqiptare, është Forumi i Gruas së Bashkimit Demokratik për Integrim.”

Kryetarja e Komunës së Tetovës dhe nënkryetarja e BDI-së, Teuta Arifi, ka thënë se BDI do të jetë çelësi i qeverisë së re.”Për këto zgjedhje përkrahja ndaj BDI-së është e madhe si rezultat i këtyre zgjedhjeve BDI duhet të jetë çelësi i qeverisjes së re, të rikrijojë demokracinë në vend dhe të miratojë raportin e Pribes. Një mandat qeverisës jo i kollajllëkut por i vështirësisë, 40% i përfaqësimit të grave si rezultat i marrëveshjes së fundit, politika është një mundësi për gratë për të ndryshuar realitetet për të krijuar fillime të reja e për të ndryshuar më shumë. A është e lehtë? Sigurisht që jo, e komplekse sigurisht që po.” ka thënë në fjalimin e saj Teuta Arifi.

Shefi i shtabit zgjedhor të BDI-së, Bekim Neziri, ka folur për rolin e gruas në fushatë dhe në parti. ”BDI dhe Ali Ahmeti nuk i trajtonë gratë dhe femrën vetëm si numër. Femra në Maqedoni udhëheq në instanca të ndryshme, në pushtet legjislativ, ekzekutiv dhe lokal. Në listat zgjedhore të BDI-së ka pasur femra shqiptare, sepse dinë të udhëheqin me politikat legjislative. Politikat e Ahmetit do të kenë trajtim të veçantë të femrës shqiptare” tha mes tjerash Neziri./Telegrafi/