Karvani shëndetësor “përSHËNDETje”, i cili ka vizituar fshatra e qytete të ndryshme të Kosovës, ka mbërritur sot edhe në Istog, ku u ofroi qytetarëve informacione dhe këshilla praktike për përmirësimin e shëndetit përmes ndryshimit të mënyrës së jetesës, përcjell Telegrafi.
Gjatë aktivitetit, profesionistët shëndetësorë kanë zhvilluar sesione këshilluese mbi:
- ushqyerjen e shëndetshme,
- rëndësinë e aktivitetit fizik në përditshmëri,
- pasojat që vijnë nga konsumimi i alkoolit dhe duhanit.
Përveç këshillave, qytetarët patën mundësinë të konsultohen drejtpërdrejt me stafin mjekësor, si dhe të kryejnë matjen e tensionit arterial dhe nivelit të glukozës në gjak.
Ky aktivitet u organizua në bashkëpunim me AQH Project, organizatën Syri i Vizionit dhe QKMF-Istog, duke synuar të rrisë ndërgjegjësimin e komunitetit për kujdesin ndaj shëndetit dhe parandalimin e sëmundjeve. /Telegrafi/
