Kandidatët për kryetar në Tetovë nënshkruajnë deklaratë për transparencë dhe ruajtje të ambientit jetësor

Me ftesë të organizatës Eco Guerilla, sot në Tetovë kandidatët për kryetar të Komunës së Tetovës kanë nënshkruar dokumentin “5 përkushtimet ndaj tetovarëve”, i cili kërkon nga kreu i ardhshëm i Komunës së Tetovës që t’u garantojnë qytetarëve se do të jenë transparent në lidhje me menaxhimin e komunës dhe do të kujdesen për ambientin jetësor.

Sipas Eco Guerilla kanë qenë të ftuar të gjithë kandidatët për kryetar në Komunën e Tetovës, ndërsa dokumentin e kanë nënshkruar vetëm Teuta Arifi nga BDI, Adnan Neziri nga Aleanca për Shqiptarët dhe Bardhyl Dauti nga PDSH, njofton Telegrafi Maqedoni.

“Eco Guerilla vlerëson se pranimi dhe nënshkrimi i këtij dokumenti është shumë domethënës për funkcionimin e demokracisë në vendin tonë, me çka edhe organizatat e shoqërisë civile përfshihen më shumë në procesin e politikëbërjes dhe vendimmarrjes. Pavarësisht faktit se të gjithë kandidatët që synojnë kreun e Komunës së Tetovës kishin konfirmuar pjesëmarrjen, dokumenti është nënshkruar nga z. Adnan Neziri (ASH), znj. Teuta Arifi (BDI) dhe z. Bardhyl Dauti (PDSH) i cili për arsye konkrete nuk mundi të ishte i pranishëm bashkë më dy nënshkruesit tjerë”, thuhet në njoftimin e Eco Guerilla./Telegrafi/