Hulumtimi i Der Spiegel: Putini kurrë nuk ka qenë super spiuni sovjetik që dëshironte që bota ta besojë – ishte thjesht djaloshi i porosive në KGB

Presidenti rus Vladimir Putin ndoshta nuk ka qenë kurrë spiuni elitar sovjetik që bota është shtyrë të besojë, ka zbuluar një hetim nga gazeta gjermane Der Spiegel.

Historitë e bëmave të Putinit si oficer i inteligjencës gjatë viteve të 80-ta ndryshojnë dhe është një epokë disi e mbuluar me mister, pasi ai vetë nuk e ka komentuar kurrë këtë periudhë, transmeton Telegrafi.

Por shumë histori e kanë përshkruar atë si një figurë heroike, i cili, ndër të tjera, i vetëm mbrojti zyrat e KGB-së nga plaçkitësit, dhe kreu misione sekrete ‘top-sekret’, si takimi me anëtarët e Fraksionit të Ushtrisë së Kuqe, një grup terrorist që shkaktoi kërdi në Gjermaninë Perëndimore dhe kreu një sërë rrëmbimesh dhe atentatesh.

Lexo po ashtu Gerashchenko: 16,000 persona gjenden në “zonën kritike” pas shkatërrimit të digës

Por sipas raportit të Der Spiegel, shumica e punës së Putinit në fakt ishte e kufizuar në detyra administrative “banale”.

Duke cituar një nga ish-kolegët e Putinit në zyrën e KGB-së në Dresden, ai thotë se “puna e tij konsistonte kryesisht në shqyrtimin e pafund të aplikimeve për vizitat e të afërmve të Gjermanisë Perëndimore ose kërkimin e informatorëve të mundshëm midis studentëve të huaj në Universitetin e Dresdenit”.

Raporti thotë se Putini përmendet rrallë në të dhënat e Stasi – emri i policisë sekrete të Gjermanisë Lindore. Në ato që e referojnë atë, ka të bëjë vetëm me gjëra të tilla si ditëlindja e tij ose detyrat administrative, asnjë nuk ofron prova për të mbështetur historitë e përmendura më lartë.

Lexo po ashtu Ukrainasit përgjojnë telefonatat e rusëve, paralajmërojnë se forcat pushtuese planifikojnë shkatërrimin e digave tjera

Horst Jehmlich, ish-oficer i Stasi-t, i cili gjithashtu ka punuar në Dresden, tha për Der Spiegel se Putini nuk ishte asgjë më shumë se një “djalë porosie”.

Putin punoi për KGB-në, shërbimin e inteligjencës së Bashkimit Sovjetik, për gati dy dekada. Ai u transferua në Dresden, në Gjermaninë Lindore, në vitin 1985 – në një kohë kur vendi ishte në ‘këmbët e fundit’.

Vetëm katër vjet më vonë, Muri i Berlinit ra, duke shënuar fillimin e fundit të Luftës së Ftohtë dhe duke hedhur një hap të madh drejt ribashkimit të Gjermanisë në vitin 1990.

Lexo po ashtu Agjencia ukrainase Energoatom: Shkatërrimi i digës mund të ketë pasoja negative për centralin bërthamor

Zyrtarisht doli në pension nga shërbimi aktiv i KGB-së me gradën nënkolonel.

Por Oleg Kalugin, ish-oficer i lartë i KGB-së dhe kritik i ashpër i Putinit, tha në një intervistë me Radion Evropa e Lirë në vitin 2015, se lideri i Rusisë kishte gënjyer dhe ishte “thjesht një major”. /Telegrafi/