Hoti pranon se ka pasur mospajtime me AAK-në sa i përket dialogut, i quan jo të duhura reagimet e tyre

Kryeministri i Kosovës, Avdullah Hoti në intervistën e tij dhënë për Telegrafin ka folur për mospajtimet brenda koalicionit qeverisës, konkretisht me partinë e Ramush Haradinajt.

Ai ka pranuar se kanë pasur disa mospajtime sa i përket procesit të dialogut, por i ka quajtur si jo të duhura reagimet e AAK-së.

“Ne kemi marrëveshje të koalicionit, dhe unë si kryeministër kam Kushtetutën e vendit dhe brenda ligjeve në fuqi ne zbatojmë programin qeverisës. Kemi pas mospajtime ose këndvështrime të ndryshme në momente të caktuara në veçanti për procesin e dialogut. Por ne kemi marrëveshje të koalicionit që duhet të vazhdoj procesi i dialogut mbi parime të qarta”, tha Hoti.

Duke komentuar deklaratën e kryetarit të AAK-së, Ramush Haradinaj njëherësh partnerit të koalicionit qeverisës, i cili tha se dialogu duhet të ndërpritet, Hoti tha se kryeministër i vendit është ai.

“Ata mund të kërkojnë që të pezullohet por unë jam kryeministër i vendit dhe unë kam një marrëveshje të koalicionit ku procesi i dialogut është i trajtuar qartë dhe jemi pajtuar për parimet sesi zhvillohet ky proces dhe unë nuk mund të lejojë që Kosova të izolohet. Procesi i dialogut duhet të vazhdojë. Ka pas disa reagime të AAK-së që nuk kanë qenë të duhura sa i përket procesit dialogut”, tha Hoti.

Ai shtoi se procesi i dialogut në këtë fazë është udhëhequr në mënyrën më të mirë tash e 10 vite. /Telegrafi/