Haskuka ankohet për testimet në Prizren: Ka raste kur detyrohem të ndërhyjë për të testuar ndonjë person

Në dy ditët e fundit në Prizren janë shënuar pesë raste të vdekjeve nga coronavirusi.

Kryetari i Prizrenit, Mytaher Haskuka thotë për RTV Dukagjinin se shumica e personave që janë të shtruar në Spitalin e Prizrenit janë në gjendje të rëndë.

“Shumë pak nga personat që po vendosen në respiratorë në Spitalin e Prizrenit po mund të shpëtojnë. Për momentin i kemi dy pacientë në respiratorë me gjendje shumë të rëndë. Por në përgjithësi të shtruarit në Prizren janë në gjendje të rëndë”, tha ai, përcjell Telegrafi.

Haskuka ka thënë se në Spitalin e Prizrenit janë të infektuar edhe një numër i madh i personelit shëndetësor.

“Nga dhjetë anesteziologë që kujdesen për oksigjenimin e pacientëve, pesë kanë qenë të infektuar madje dy prej tyre me oksigjen por që për fat të mirë nuk janë në gjendje të rëndë”.

I pari i Prizrenit është shprehur i shqetësuar edhe për vonesën e publikimit të rezultateve të coronavirusit.

“Në disa raste rezultatet po na vonohen deri në pesë ditë. Nga IKSHP rajonale e Prizrenit na kanë njoftuar se vonesa po ndodh për shkak të numrit të madh të testeve”.

Haskuka thotë se në disa raste po detyrohet edhe ai si kryetar të ndërhyjë për të lejuar testimin e një personi.

“Ka raste kur unë duhet të ndërhyrë për të lejuar që x personi të testohet. Mendoj se çdo qytetarë ka të drejtë të testohet nëse ka simptoma dhe është i referuar nga mjeku”, deklaroi ndër të tjera Mytaher Haskuka”, deklaroi ndër të tjera Mytaher Haskuka./Telegrafi/