Hasani përfaqëson Kosovën në Komisionin e Venecias

Ish kryetari i Gjykatës Kushtetuese të Kosovës, Enver Hasani, ka udhëtuar për në Itali ku do të përfaqësojë Kosovën në Komisionin e Venecias.

“Në sesionin plenar të 106-të të Komisionit të Venecias do të diskutohet bashkëpunimin e Komisionit të Venecias me Komitetin e Ministrave, Asamblenë Parlamentare , si dhe me Kongresin e Autoriteteve Regjionale e Lokale të Këshillit të Evropës, temë kjo me rëndësi të madhe aktuale për Kosovën”, thuhet në komunikatën e zyrë së ish-kryetarit të Kushtetueses.

Enver Hasani, që dikur ishte edhe Rektor i universitetit të Prishtinës, është akuzuar nga Prokuroria Speciale e Kosovës për veprën penale Mashtrim në Detyrë për shkak se “kishte falsifikuar kontratën origjinale përkthimi i librave nga gjuha angleze në gjuhën shqipe, për nevojat e Universitetit të Prishtinës”.

Komisioni i Venecias është një organ këshillues i Këshillit të Europës, i përbërë nga ekspertë të pavarur të të drejtës kushtetuese. Emri zyrtar i këtij komisioni është “Komisioni Europian për Demokraci përmes Ligjit”.