Haradinaj: Kosova mori lajmin e shumëpritur për hapjen e rrugës së liberalizimit të vizave

Kryeministri i Kosovës, Ramush Haradinaj ka theksuar se Kosova mori lajmin e shumëpritur për hapjen e rrugës drejt lëvizjes së lirë dhe përafrimit me familjen e madhe evropiane.

Ai këto komente i ka bërë në profilin e tij në Facebook, pas takimit të tij në Bruksel më zyrtarët e BE-së.

“Populli i Kosovës me shumë arsye i gëzohet sot rekomandimit pozitiv të Komisionit Evropian për lëvizje të lirë në vendet e BE-së, duke u vlerësuar i barabartë me të gjithë qytetarët tjerë të rajonit dhe ata evropianë. Me shumë përkushtim dhe vizion Qeveria që unë drejtoj, pergjatë tërë këtyre muajve, ka punuar pa u kursyer, në përmbushjen e kritereve të fundit të BE-së”, ka shtuar Haradinaj.

Ai ka theksuar se duke qenë të vetëdijshëm për sfidat, do ta intensifikojmë sipas tij, luftën kundër korrupsionit dhe krimit të organizuar dhe fuqizimin e vazhdueshëm të sundimit të ligjit, me bindjen se Parlamenti dhe Këshilli Evropian do të përfillin rekomandimin e Komisionit dhe qytetarët kosovarë do të lëvizin pa viza.

“Liberalizimi për Kosovën do të diskutohet deri në fund të gushtit në Parlamentin Evropian, kurse i tërë procesi pritet të përmbyllet deri në fund të vitit”, ka shtuar Haradinaj. /Telegrafi/