Hamza: Projektligji për Rimëkëmbje i propozuar nga Qeveria nuk e përkrahë sektorin privat

Partia Demokratike e Kosovës ka thënë se Projektligji për Rimëkëmbjen Ekonomike i propozuar nga Qeveria e Kosovës, nuk është i duhuri dhe se i njëjti nuk e përkrahë sektorin privat.

Shefi i Grupit Parlamentar të kësaj partie, Bedri Hamza tha se vendi është në një situatë të rëndë ekonomike si pasojë e pandemisë dhe mosveprimit të duhur nga ana e institucioneve.

Ai tha se kjo gjendje mund të përkeqësohet edhe më tutje nëse nuk veprohet me kohë dhe në mënyrën e duhur.

“Ne propozojmë që të ulemi bashkërisht, që ta bëjmë një ligj të mirëfilltë të jenë të kyçur edhe Asociacioni i bizneseve, Oda Ekonomike, Oda Amerikane, Aleancën Kosovare të Biznesit, duke përfshirë edhe partitë tjera politike dhe ta bëjmë një ligj të mirë dhe të qëndrueshëm i cili përkrah sektorin privat dhe kategoritë tjera”, tha Hamza, shkruan Telegrafi.

Hamza tha se nëse është në pyetje vetëm tërheqja e 10 për qindëshit nga Trusti, atëherë Qeveria nuk duhet ta emërtoj këtë si Ligj për Rimëkëmbje, por kjo mund të bëhet  përmes Ligjit për Fondin e kursimeve pensionale.

“Nëse është në pyetje vetëm mjetet e Trustit, atëherë ne si PDK propozojmë që me një amendament në Ligjin për Fondin e kursimeve pensionale të kryhet në procedurë të përshpejtuar që njerëzve tu mundësohet tërheqja e mjeteve prej 10 për qind, por ne si PDK mendojnë që një pjesë e tyre nuk është që kanë grumbulluar mjete të mjaftueshme që ja siguron një pension që këto mjete të rimbursohen. Ligjin të cilin e ka propozuar Qeveria nuk ka substancë, nuk e përkrahë sektorin privat e kategoritë tjera”, u shpreh Hamza.

Ai shtoi se  Qeveria është mirë me votu propozimin e tyre sepse sipas tij ai është më i dobishëm për ekonominë.

Hamza siguroi Qeverinë që nëse bëhet fjalë për Trustin, atëherë PDK do t’i jap votat edhe në lexim të parë dhe të dytë, nëse sillet si nen në Ligjin për Fondin e kursimeve pensionale. /Telegrafi/