Grubi: Faleminderit deputetëve që votuan sot pro ndërtimit më të lirë dhe më të shpejtë të korridoreve

Zv.kryeministri Qeverisë dhe ministri për Sistem Politik dhe Marrëdhënie Ndërmjet Bashkësive, Artan Grubi ka përshëndetur sot miratimin e ndryshimeve të ligjeve që mundësojnë ndërtimin më të shpejtë dhe më të lirë të korridoreve 8 dhe 10D.

Grubi ka falënderuar deputetët që me votën e tyre u rreshtuan sot në anën e drejtë dhe nuk lejuan vazhdimin e sagës dashakeqëse të atyre që për pikë të ulëta politike nuk kursyen gjë pa thënë e nuk lanë gjë pa bërë për të bllokuar realizimin e investimit më të madh infrastrukturor në historinë e vendit.

Ai në postimin e tij, ka ripërsëritur shprehjen “Pushka top iu bëftë, por kjo S’NDALET” që shpreh përkushtimin e Qeverisë së vendit për të realizuar korridoret që janë shteg drejt horizontit të ri të zhvillimit ekonomik të vendit, edhe përkundër të gjitha obstruksioneve dhe dezinformatave të plasuara në opinion.

Ndryshe, sot Kuvendi i Maqedonisë së Veriut miratoi ligjet për ndërtimin e Korridoreve 8 dhe 10-D nga konsorciumi “Bechtel dhe Enka”, të cilat u propozuan me flamur europian dhe me procedurë të shkurtuar./Telegrafi/