Google sjell risi të shumta në Google+

Google ka prezantuar 18 karakteristika të reja në rrjetin e saj social Google+, duke përfshirë edhe përditësimet e shumta në shërbimin e njohur të komunikimit Hangouts dhe mjete të reja shtesë për përdoruesit të cilët shfrytëzojnë faqen për fotografi. Të rejat tjera do të zbulohen në "ditët e ardhshme," thuhet sipas zëdhënësit të kompanisë.

Google gjithashtu publikoi disa shifra të reja dhe interesante për përdoruesit e Google, duke konfirmuar se rrjeti i saj social tashmë ka 540 milionë përdorues aktivë, në qoftë se numërohen edhe qasjet përmes Gmail.

Ndërsa nëse numërohen vetëm përdoruesit e drejtpërdrejt të Google+, atëherë faqja ka 300 milionë shfrytëzues aktivë në muaj. Përdoruesit e Google+ gjithashtu janë shumë aktivë pasi që të njëjtit ngarkojnë 1.5 miliardë fotografi në javë, tha se Vic Gundotra, përfaqësuesi kryesor për Google+.

Disa prej risive brenda Hangout përfshijnë edhe gjeo-lokacionin, të cilin përdoruesit mund ta shtojnë në komunikimin e tyre me miqtë, dhe ky funksion i ri mbështetet nga Google Maps. Versioni i ri i Hangouts përfshin edhe GIF-ët e animuar.

Në anën e fotografive, Google+ vazhdon ta pozicionojë veten si platforma më e mirë sociale për përdoruesit të cilët kujdesen për fotografitë e tyre. Një mjet i ri i quajtur Auto Awesome Erase, heq njerëzit ose objektet tjera nga fotot tuaja. Nëse ju shkrepni një fotografi në rrugë me shokët tuaj, dhe në të ka edhe njerëz të huaj në prapavijë me funksionin e ri ata mund të fshihen automatikisht.

Google tani e ka bërë më të lehtë për përdoruesit të kërkojnë fotografi në rrjetin social, pasi që faqja tani ka shtuar më shumë se 1.000 terma të ri kërkimi të cilat algoritmi i Google Image i identifikon automatikisht, dhe pas kërkimit të përdoruesve, motori i kërkimit të fotografive brenda Google+ gjen fotot përkatëse edhe në qoftë se ato nuk janë të etiketuara.

Google+ gjithashtu do të mbështesë edhe ngarkimet e fotografive në të gjitha madhësitë dhe rezolucionet, kështu që përdoruesit nuk duhet të kompromentojë cilësinë e fotografive të tyre për t’i ngarkuar ato në rrjetin e tyre social, tha Gundotra

Për më shumë, Google+ gjithashtu zbuloi një funksion të ri të quajtur Auto Awesome Video, me të cilin shërbimi automatikisht konverton fotot dhe videoklipet e përdoruesit në një film të shkurtër, të kompletuar edhe me audio.

Pasi Google+ të përcaktojë se cili grup i videove dhe fotove janë bërë në të njëjtën periudhë kohore, faqja automatikisht do t’i filtrojë ato për të zgjedhur ato që janë më interesantet dhe me cilësinë më të lartë, dhe t’i përfshijë ato në filmin e shkurtër.

Më pas, përdoruesit e kanë mundësinë e editimit të videos, nëse ata duan, duke ndryshuar motivit dhe filtrate e videos, si dhe kohëzgjatjen e klipit apo tingullit në të.

Google ka thënë se të gjitha këto përditësime së shpejti do të jenë në dispozicion për përdoruesit, dhe se do t’i njoftojë ata se kur këto risi do të shfaqen në Play Store. / Telegrafi /