Gold AG pret vendimin e gjykatës për “Shqiptar 2” (Video)

Që pas publikimit të projektit “Shqiptar 2”, Gold AG hasi në probleme nga më të ndryshmet. Kjo punë përfundoi në gjykatë, pasi deputetja Alma Lama e pat paditur këngëtarin, me arsyetimin se ka fyer dinjitetin e saj përmes këtij projekti muzikor.

Së fundmi, “Shqiptar 2” u largua edhe nga kanali YouTube.

Sa i përket kësaj, Golldi ka mohuar të japë ndonjë deklaratë, duke thënë se është në pritje të vendimit të Gjykatës, përveçse pranon se vet ai e ka larguar projektin nga YouTube, për ta respektuar procesin.

“Kam vendosur të mos flas për media, derisa të përfundoj gjithçka. Jemi duke e pritur vendimin e gjykatës dhe besoj që shumë shpejt projekti ‘Shqiptar 2’ do të kthehet në YouTube. Këngën e kam larguar me vetëdëshirë. Dua që gjithçka ta zgjidhi në mënyrë paqësore dhe kjo është vetëm për ta respektuar procesin,” ka thënë Gold AG për emisionin Express Summer të KTV-së.

Gjykata e shkallës së parë pati pranuar dy kërkesa të Lamës për padi kundër Arian Agushit, për ta vendosur masën e sigurisë, përkatësisht bllokimin e këngës ‘Shqiptar 2’ dhe t’ia bllokojë llogaritë bankare.

Edhe kjo e fundit është pranuar pasi të gjitha llogaritë bankare të këngëtarit janë të bllokuara, pavarësisht që gjykata nuk ka dalë ende me ndonjë vendim.

Goldi po ashtu bëri të ditur se edhe ai ka dorëzuar ankesë në Gjykatë dhe është në pritje për hapat e mëtutjeshëm që do të merren.