Gjykatësi federal miraton planin e Trumpit për të shpërbërë USAID-in: Stafi të kthehet në shtëpi

Gjykatësi federal, Carl Nichols dje mori një vendim që hapi rrugën për një nga hapat e fundit të administratës së presidentit, Donald Trump në shpërbërjen e Agjencisë Amerikane për Zhvillim Ndërkombëtar (USAID).

Në fakt, ky vendim i jep administratës së presidentit së re amerikane mundësinë të fillojë tërheqjen e mijëra punonjësve të USAID-it nga e gjithë vendi dhe bota. Nichols nuk pranoi t’i mbajë ata përkohësisht në detyrë, që do të thotë se tani fillon afati 30-ditor për kthimin e punonjësve të USAID-it nga jashtë, me shpenzimet e qeverisë amerikane.

Ky vendim pason një padi të paraqitur nga sindikatat në emër të punonjësve të Agjencisë, duke përfshirë ata që rrezikojnë të mbeten jashtë vendit.

Lexo po ashtu Çfarë është USAID-i dhe sa qendror është ai për politikën e jashtme të SHBA-së?

Në padi pretendohet se administrata e Trumpit ka vonuar kthimin e punonjësve dhe bashkëshortëve të tyre nga jashtë, duke rrezikuar ata që tashmë janë në arrati nga dhuna politike në Kongo, pa asnjë mbështetje nga SHBA-ja.

Padia gjithashtu sfidon kushtetutshmërinë e shpërbërjes së USAID-it, duke argumentuar se një veprim i tillë do të kërkonte miratimin e Kongresit.

Megjithatë, gjykatësi Nichols vlerësoi se ky mosmarrëveshje duhet të zgjidhet në përputhje me ligjin federal të punësimit dhe jo në një gjykatë rrethi, raporton politico.

Shpërbërja e USAID-it është pjesë e një ulje të madhe të sektorit publik amerikan, që po zbatohet nga multimiliarderi Elon Musk me urdhër të Trumpit. Musk dhe Trump pretendojnë se kjo ulje është një mënyrë për të kursyer miliarda dollarë. /Telegrafi/