“Get in the Ring” vjen me edicionin e përbashkët Shqipëri-Kosovë

Gara prestigjoze globale e cila çdo vit bën bashkë mijëra biznese startup, vjen me edicionin e parë të përbashkët Shqipëri-Kosovë, me organizim të Innovation Centre Kosovo (ICK), CID Tirana dhe me mbështetje të Ambasadës Norvegjeze.

Ringu i vërtetë i boksit do të jetë arena e përballjes së ideve inovative për biznese startup nga Shqipëria dhe Kosova, të cilat do të garojnë për çmime dhe përfaqësim të dy shteteve në finalen e madhe e cila sivjet organizohet në Cascais të Portugalisë.

Të rinjtë e dy shteteve, me ide dhe zgjidhje inovative të cilat kanë ndikim në shoqëri, mund të aplikojnë për të qenë pjesë e garës, deri më 30 Mars 2017. Të gjithë garuesit e përzgjedhur (në bazë të kritereve bazë), do të ftohen në Tiranë prej datës 11-14 Prill, ku do të kenë mundësinë të njihen me konkurrentët, të ndjekin trajnim profesional për prezantim si dhe t’i nënshtrohen “betejave” para kualifikuese më datën 13 Prill.

Betejat kryesore do të zhvillohen më datën 14 Prill dhe një juri profesionale do të bëjë përzgjedhjen e fituesit/fituesve të edicionit 2018.

“Kjo garë është një mundësi shtesë për ndërmarrësit që ta sfidojnë veten, dhe të përfaqësojnë vlerat tona më të mira në nivel global”, thekson Uranik Begu, drejtor ekzekutiv i ICK-së.

Për më shumë informata si dhe për të aplikuar, klikoni KËTU.

Get in the Ring 2018 është pjesë e projektit rajonal Shqipëri-Kosovë dhe mbështetet nga Ambasada e Norvegjisë në Prishtinë.