Fushata “Toka jonë, shija juaj” kontribuon në ndërgjegjësimin për konsumin e produkteve vendase

Qytetarët e Pejës patën mundësinë të shijojnë llojllojshmëri produktesh të cilësore dhe të shëndetshme vendore gjatë një eventi të organizuar në kuadër të kampanjës “Toka jonë shija juaj”.

Ky aktivitet, që synon të rrisë ndërgjegjësimin për konsumimin e produkteve vendore, u organizua nga Caritas-i Zviceran, në partneritet me shoqatat Organika, Mjedra e Kosovë dhe PePeKo.

Drejtori i Caritas-it zviceran në Kosovë, Gerhard Schaumberger, ka shprehur me krenari përkushtimin për organizimin dhe promovimin e produkteve lokale dhe zhvillimin e turizmit, të cilat mundësojnë krijimin e një tregu më të madh.

“Motoja jonë ‘Toka jonë shija juaj’, shpresoj që do të mirëpritet gjerësisht sepse janë produkte të tokës tonë me një shije shumë të mirë edhe sa i përket turizmit besojë që jemi në një pozitë mjaft të mirë për t’i prezantuar, për t’i reklamuar produktet tuaja për të pasur një treg më të madh”, tha ai.

Ndërsa, organizatorët theksuan se qëllimi kryesor i kampanjës ishte ngritja e vetëdijes dhe të inkurajojë konsumatorët që të zgjedhin produkte vendore për cilësinë dhe freskinë e tyre.

Sefedin Haxhia, ekspert i marrëdhënieve me publikun në Caritas-in zviceran, deklaroi se ky event ka për qëllim promovimin e produkteve vendore dhe të inkurajojë blerësit që të konsumojnë këto produkte, duke theksuar se ato janë më të shëndetshme dhe më të shijshme.

“Ne falë projekteve të reja, ne bashkëpunojmë me shumë biznese që të mundemi secili prej nesh të shohim më shumë produkte vendore, të prodhojmë më shumë produkte vendore të cilat janë produkte cilësore dhe të vetëdijesohemi më shumë për produktet që kemi dhe vlerat që kanë dhe fermerët punëtorë që na sjellin këto produkte”, ka thënë ai.

Një falënderim i veçantë u adresua për kryetarin e Komunës së Pejës, Gazmend Muhaxheri, për mbështetjen e tij për këtë nismë të rëndësishme, ashtu sikurse Drejtorinë e Bujqësisë dhe Drejtorinë e Arsimit të komunës së Pejës.

Kryetari Muhaxheri tha se këto iniciativa janë të qëlluara të cilat arrijnë t’i dalin në ndihmë fermerëve dhe prodhuesve të Kosovës.

“Është një projekt i qëlluar i cili u ka dalë në ndihmë fermerëve tonë. Dy projekte shumë të rëndësishme për kultivimin e mjedrës dhe kultivimin e boronicës. Shpresojmë që ky projekt të jetë një nismë e mbarë që ata të bëjnë më të mirën me bujqësi dhe ta rrisin produktivitetin e tyre”, është shprehur Muhaxheri.

Po ashtu, edhe zëvendësdrejtori i Austrian Development Agency (ADA), Arsim Aziri është shprehur se këto aktivitete janë të mirëseardhura në mënyrë që Kosova të ketë edhe përfitime sa më të mëdha.

“Është kënaqësi e veçantë që jemi sot këtu. Shpresoj që edhe në të ardhmen bashkëpunimi ka për të vazhduar dhe të shohim përfitime edhe më të mëdha dhe produkte sa më shumë prej fermerëve”, tha ndër të tjera Aziri.

Gjatë eventit, vizitorët morën pjesë në një sërë aktivitetesh dhe shpërblimesh të ndryshme që theksuan rëndësinë e produkteve vendore.

Aktivitetet përfshinë Face Painting (ngjyrosje e fytyrës) për fëmijë dhe të rritur, krijimin e koktejeve të freskëta me përbërës nga prodhimet vendore, si dhe një sesion të vizatimit të produkteve vendore për të krijuar një ekspozitë online me shpërblime për fituesit.

Eventi u organizua në kuadër të programit #EREA, i cili mbështetet financiarisht nga Agjencia Austriake për Bashkëpunim dhe Caritas-i Zviceran. Programi ka për qëllim të promovojë dhe fuqizojë zhvillimin e ekonomisë rurale në Kosovë.