Franca “po goditet” nga propaganda ruse, ka njoftuar ministri francez për Evropën

Franca “po goditet” nga dezinformatat ruse që mund të shtrembërojnë rezultatin e zgjedhjeve të ardhshme parlamentare të BE-së, ka paralajmëruar ministri francez për Evropën, Jean-Noël Barrot.

Barrot tha se propaganda ruse po shpërndahet në rrjete sociale çdo javë.

“Ne jemi duke u goditur nga propaganda e Rusisë së Vladimir Putinit. Nuk kalon asnjë javë pa u bërë Franca objektiv i manovrave të koordinuara dhe të qëllimshme për të prishur debatin publik dhe për të ndërhyrë në zgjedhjet evropiane”, tha Barrot.

Ai përmendi disa shembuj duke përfshirë një faqe të rreme interneti që pretendonte se 200 mijë francezë ishin thirrur për të luftuar në Ukrainë, shkruan the Guardian, përcjell Telegrafi.

“Uebsajti është i rremë dhe është llogari keqdashëse si pjesë e një fushate dezinformimi”, tha Ministria franceze e Mbrojtjes.

Bëhet e ditur se këto uebsajte të identifikuara si një nga format e shumta të dezinformimit rus, përfshijnë krijimin e faqeve të internetit të tilla si ato të qeverisë dhe mediave kryesore të vendit.

Depuis le discours ambitieux d’@EmmanuelMacron en 2017, la France a transformé l’Europe.

Pour @OuestFrance, je reviens sur la force de notre bilan, l’offensive de la Russie contre nos démocraties et le discours du président de la République ce jeudi. ⤵️https://t.co/XDVvXvhZqx

— Jean-Noël Barrot (@jnbarrot) April 21, 2024

Lajme tjera janë shpërndarë edhe nga një uebsajt tjetër i rremë që pretendonte se Franca po shtrëngon kushtet e hyrjes në territorin francez për ukrainasit.

Gjithashtu, ka qarkulluar edhe një histori e rreme për rritje të rasteve me tuberkuloz te francezët.

Ndryshe, Belgjika e cila mban presidencën e radhës gjashtëmujore të BE-së, po kërkon aktivizimin e një grupi të përkohshëm për monitorimin dhe koordinimin e përgjigjeve ndaj propagandës ruse.

Edhe BE-ja vazhdimisht paralajmëron për rritjen e dezinformatave që ndonjëherë synojnë zgjedhjet, e ndonjëherë çështje të tilla si Ukraina, migrimi dhe të drejtat e komunitetit LGBTQ.

Njësia evropiane e dezinformimit ka identifikuar 17 mijë raste specifike të informacioneve të rreme në rrjetet sociale dhe uebsajtet e ndryshme. /Telegrafi/