FFK: Inspektorët e UEFA-s shfaqën shqetësimet e tyre për rrjedhën e punimeve në Stadiumin e Prishtinës

Me një minutë heshtje në nderim të ish-presidentit Fadil Vokrri, ka filluar të mërkurën mbledhja e Komitetit Ekzekutiv të FFK-së nën drejtimin e nënpresidentit Agim Ademi.

“KE theksoi se vdekja e presidentit Vokrri është një humbje e madhe për futbollin e Kosovës dhe jo vetëm”.

“Por, KE mendon se duhet të vazhdohet edhe më me ngulm në realizimin e projekteve dhe objektivave të saj dhe të gjitha atyre projekteve që i kishte synuar ish-presidenti dhe ky Komitet Ekzekutiv, madje duke ndjerë obligim të dyfishtë”.

Lexo po ashtu Të gjitha lajmet për Stadiumin e Prishtinës

“Kështu KE sot shqyrtoi gjendjen e përgjithshme në futbollin e Kosovës”.

“Të martën krerët e FFK-së u takuan me zyrtarë dhe inspektorë të UEFA-së, të cilët vizituan stadiumin e Prishtinës, ku shfaqen shqetësimet e tyre për rrjedhën e punimeve duke sugjeruar një angazhim më të madh të FFK-së, MKRS dhe punëkryerësit në mënyrë që punimet të përfundojnë sa më parë”.

“KE bisedoi se duhet të vazhdohet me fillimin e implementimit të projekteve të ndërtimit të 12 fushave si dhe Qendrën teknik stërvitore në Obiliq”.

“KE gjithsesi mendon se top prioritet edhe më tutje mbetet rinovimi i stadiumit të Prishtinës si domosdoshmëri për ndeshjet kualifikuese për Ligën e Kombeve të Kombëtares A”, thuhet në një njoftim në faqen e FFK-së.