Federata Italiane e Futbollit ka përgatitur një çmim për De Biasin

Gianni De Biasi mbetet një ndër personazhet më popullorë në Itali dhe kualifikimi me Shqipërinë për në Kampionatin Europian 2016 konsiderohet me të drejtë një arritje e madhe.

Deri tani nderimet dhe çmimet nuk i kanë munguar trajnerit të kombëtares sonë, por një ndër më prestigjiozët do t’i jepet të hënën, më 7 mars.

Sektori Teknik i Federatës Italiane të Futbollit (FIGC) organizon prej sezonit 1990/1991 një ceremoni ku i jepet çmimi Bankina e Artë trajnerit më të mirë të sezonit në Serinë A italiane (më pas janë shtuar edhe kategoritë e ulta), bazuar në votimet e trajnerëve të tjerë.

Më pas, një çmim special është dhënë edhe për trajnerë italianë që kanë arritur gjëra të mëdha jashtë Serisë A dhe këtë vit i nderuari do të jetë De Biasi, transmeton Sportal.al.

Në Koverçano trajnerit tonë do t’i dorëzohet çmimi prestigjioz nga Presidenti i Sektorit Teknik, Gianni Rivera dhe nga Drejtori i Shkollës së Trajnerëve, Renco Ulivieri, me motivimin e ngritjes lart të emrit të shkollës italiane të trajnerëve në arenën ndërkombëtare.