Fajësojeni inteligjencën artificiale për intervistat tuaja rraskapitëse për punë

Nga: Elaine Moore / The Financial Times
Përkthimi: Telegrafi.com

Intervistat e punës ofrojnë shumë mundësi për poshtërim. Kush dëshiron të përshkruajë dobësinë e tij më të madhe përpara një paneli? Apo të ndihet sikur po merr pjesë në një shfaqje kuizash me pyetje si: “Sa topa golfi mund të fusësh në një aeroplan Boeing 747”? Fatkeqësisht, për ata që kërkojnë punë, këto biseda të komplikuara po bëhen gjithnjë e më të vështira.

Kërkesat nga komitetet e punësimit në sektorin e teknologjisë po grumbullohen. Kjo do të thotë më shumë intervista, por edhe më shumë teste teknike. Përveç vlerësimeve të kodimit, kërkohen ese, detyra të gjata për t’u kryer në shtëpi dhe madje ditë të tëra pune me ekipet ekzistuese. Një shoqe në Zonën e Gjirit në San Francisko, kaloi disa raunde intervistash, vetëm që në fund t’i jepej sfida për të “argëtuar” drejtuesit e kompanisë. Nuk kishte udhëzime të tjera. Ajo nuk u pranua në punë.

Po ashtu nga Elaine Moore:

– Ndarja e Google-it mund t’i kthejë gjigantët në mesatarë
– Harrojeni privatësinë, përdoruesit e rinj të internetit duan të jenë të gjurmuar

Rekrutuesit thonë se kjo nuk bëhet për të vështirësuar jetën e atyre që kërkojnë punë, por sepse po bëhet gjithnjë e më e vështirë të gjesh kandidatët e duhur. Sipas tyre, fajin e kanë vetë ata që kërkojnë punë. Publikimet në internet e bëjnë të lehtë dërgimin e aplikimeve spekulative. Në Mbretërinë e Bashkuar, Instituti i Punëdhënësve të Studentëve raportoi se këtë vit ka marrë një rekord prej 1.2 milionë aplikimesh për 17 mijë vende pune për të porsadiplomuarit. Krijuesi i softuerëve për burimet njerëzore, Workday, raporton se numri i aplikimeve globale për punë po rritet katër herë më shpejt sesa hapjet e vendeve të punës.

Kjo tepricë përfshin edhe aplikimet nga kandidatë që përdorin çetbotin e inteligjencës artificiale [IA], ChatGPT, për të përpiluar aplikimin e tyre me aftësi që mund të mos i zotërojnë. Disa madje përpiqen të mashtrojnë softuerin e rekrutimit duke përdorur shkronja të bardha – duke renditur kërkesa që nuk i plotësojnë e që janë të padukshme për syrin e njeriut, por të dallueshme për softuerin e skanimit.

Pra, nga këndvështrimi i punëdhënësit, ka kuptim shtimi i pengesave për kandidatët. Aplikimet e ndihmuara nga IA-ja mund të maskojnë kandidatët e dobët, të cilët dështojnë gjatë disa intervistave. Po ashtu, një folës i shkathët që kalon me lehtësi intervistat ballë për ballë, mund të zbulohet nga testet në detyra konkrete ose gjatë punësimit të përkohshëm.

Në disa kompani, nuk mjafton të jesh i mirë në punën tënde. Duhet të tregosh përkushtim ndaj parimeve të kompanisë. Amazon-i është e njohur për vlerësimin e kandidatëve bazuar në 16 parimet e saj të lidershipit. Nëse nuk arrin të dëshmosh obsesionin për klientët ose aftësinë për të menduar në mënyrë të guximshme, do të përfundosh sërish duke kërkuar punë.

Problemi është se shtimi i intervistave dhe testeve lodh kandidatët dhe intervistuesit, duke u marrë kohë nga puna e vërtetë. Lajmi edhe më irritues është se këto metoda mund të mos jenë as produktive. Në vitin 2016, Google deklaroi se katër intervista ishin të mjaftueshme për të parashikuar nëse dikush duhej punësuar. Sipas kompanisë, gjithçka më shumë se kaq ishte humbje kohe.

Megjithatë, ky rregull nuk merr parasysh pengesat që vendosen përpara intervistave. Të rinjtë që kërkojnë punë shpesh ankohen se prindërit e tyre ende besojnë se është e mundur të veshësh një kostum të duhur dhe të dorëzosh një CV në recepsion. Në realitet, procesi standard përfshin tashmë një aplikim elektronik, vlerësimin e rezymeve dhe testimin digjital përpara se të zhvillohen takimet e drejtpërdrejta. Softuerët për kontrollin e aplikimeve, si Taleo nga Oracle, përdoren për të eliminuar kandidatët para se të kenë mundësinë të ndërveprojnë me dikë në kompani. Aplikantët e pasuksesshëm shpesh injorohen plotësisht.

Ndërsa procesi zgjerohet, zgjatet edhe koha për të siguruar një punë. Hulumtimi nga këshilltari amerikan për burimet njerëzore, Josh Bersin, e vendos mesataren në 45 ditë. Në fushat si teknologjia, kjo kohë mund të jetë shumë më e gjatë. Inxhinieri i softuerit, Rohit Verma, ka shkruar në blogun e tij për përvojën e sigurimit të roleve në kompanitë e mëdha amerikane të teknologjisë. Te Meta, shkruan ai, i janë dashur rreth katër muaj nga rekomandimi deri te oferta për punë.

Kjo do të ishte më e pëlqyeshme nëse sektori i teknologjisë nuk do të kishte prirje për pushime masive nga puna. Sipas faqes së të dhënave të drejtpërdrejta të ofruara nga njerëzit, Layoffs.fyi, pas një periudhe të punësimit masiv gjatë pandemisë, sektori shkurtoi rreth 264 mijë vende pune në vitin e kaluar. Deri tani, këtë vit, kompanitë si TikTok dhe Snap kanë shkurtuar mbi 149 mijë vende pune. Kjo do të thotë që tani janë pa punë shumë punonjës që i janë nënshtruar këtyre proceseve intensive intervistimi.

Aty ku teknologjia udhëheq, sektorët e tjerë kanë tendencë ta ndjekin. Mund të ndodhë që procesi i punësimit të bëhet gjithnjë e më i mundimshëm edhe në fushën tuaj të punës.

Lajmi i mirë është se gjithmonë ka një përjashtim. Ndonjëherë, gjetja e një pune mund të jetë po aq e thjeshtë sa dërgimi i një postimi në Twitter. Në vitin 2019, një britanik 28-vjeçar u punësua për të udhëhequr mediat sociale të Tesla-s, pasi postoi një foto të një dashi gjigant me mbishkrimin: “Shikojeni këtë njësi absolute”. Megjithatë, të tërhiqje vëmendjen e Elon Muskut nuk rezultoi të jetë koncept më i sigurt se të tjerët. Brenda një viti, menaxheri i mediave sociale u largua nga roli që fitoi. /Telegrafi/