Eurostat zyrtarizon ngadalësimin

Eurostat ka konfirmuar ngadalësimin e Eurozonës gjatë tremujorit të dytë të vitit. Ekonomia e bllokut me 19 vende gjatë periudhës prill-qershor u rrit me vetëm 0.3%, nga 0.6% në tremujorin e parë të vitit.

Në terma vjetorë, rritja përkthehet në një normë prej 1.6%. Të dhënat e Eurostat janë në linjë me pritshmëritë e tregjeve dhe të analistëve. Rritja vjetore ngadalësohet kështu nga 1.7 në 1.6%. Sa i përket Bashkimit Europian ndërkohë, rritja ekonomike fiksohet pranë 0.4% në terma tremujorësh dhe në 1.8% në trema vjetorë.

Sa i përket Gjermanisë, që është edhe ekonomia më e madhe e Europës, rritja fiksohet pranë 0.4% gjatë tremujorit të dytë të vitit, një ngadalësim i ndjeshëm në krahasim me hapin e tremujorit të parë.

Spanja ndërkohë nuk di të ndalet, pavarësisht krizës së rëndë politike që ka mbërthyer vendin prej 8 muajsh tashmë.
Madridi raporton një rritje pranë 0.7%. Franca dhe Italia ndërkohë, që janë edhe ekonomia e dytë dhe e tretë më e madhe e eurozonës, raportojnë një stranjacion të ekonomisë gjatë tremujorit të dytë, me një rritje zero. Këto të dhëna zhgënjejnë edhe pritshmëritë. /Telegrafi/