Dekani i Fakultetit Juridik, Avni Puka, ka reaguar pas akuzave të ish-kryetarit të Gjykatës Kushtetuese, Enver Hasani, se doktorata e tij është mbi 50 për qind plagjiaturë.
Përmes një reagimi të bërë publik të mërkurën, Puka i ka demantuar këto akuza, duke thënë që deklarimet e tilla janë shpifje, hapje thashethemesh dhe fyerje.
“Për akuzat ndaj integritetit tim akademik dhe shkencor, nuk kam asnjë problem, sepse doktoratura ime është produkt i punës time dhe përkushtimit disa vjeçar (e verifikuar nga komisione, mekanizma e profesorë me kredenciale akademike). Por megjithatë, për shkak të akuzave publike, këtë çështje do ta adresoj tek autoritetet kompetente, për të provuar një gjë të tillë”, ka shkruar Puka në llogarinë e tij në Facebook.
Ai ka paralajmëruar se do të ndjekë të gjitha rrugët ligjore ndaj Hasanit dhe ka thënë se shumë shpejt të gjitha këto akuza të cilat sipas tij janë denigruese dhe të pabaza, do të dëshmohen si të pavërteta.
“z. Hasani duhet ta dijë se si funksionon një institucion dhe cila është mënyra e adresimit të çfarëdo pretendimi. Por ai ka zgjedhur median, të pavërtetën dhe një paraqitje shumë kaotike për të bërë akuza të pabaza dhe për të shprehur urrejtjen e tij personale. Ai asnjë herë nuk ka ngritur pretendim të tillë në mënyrë institucionale, nuk ka ndjekur asnjë procedurë dhe nuk ka asnjë bazë. Pra, i ka dhënë të drejtën vetës që ta bëjë gjyqin publik”, ka shkruar tutje dekani. /Telegrafi/
