Edhe një problem për Trumpin, policia konfirmon dyshimet për sulm seksual të kandidatit për Sekretar të Mbrojtjes

Një grua u ka thënë policisë se ishte sulmuar seksualisht në vitin 2017 nga Pete Hegseth, pasi ai i mori telefonin, bllokoi derën e një dhome hoteli në Kaliforni dhe refuzoi ta linte të largohej, sipas një raporti të hollësishëm hetimor të bërë publik të mërkurën vonë.

Hegseth, ish-moderator i Fox News dhe i nominuar prej presidentit të zgjedhur Donald Trump për të qenë Sekretar i Mbrojtjes, i tha policisë në atë kohë se te dy kishin rënë dakord dhe mohoi çdo shkelje ligjore, thuhet në raport.

Lajmi doli në pah javën e kaluar kur zyrtarët lokalë publikuan një deklaratë të shkurtër duke konfirmuar se një grua e kishte akuzuar Hegseth për sulm seksual në tetor të vitit 2017, pasi ai kishte folur në një ngjarje për gratë republikane në Monterey.

Avokati i Hegseth, Timothy Palatore, tha në një deklaratë se raporti i policisë konfirmon “atë që kam thënë gjithmonë, se incidenti u hetua plotësisht dhe policia gjeti se kjo ishte akuzë e rreme”.

Hegseth pagoi gruan në vitin 2023 si pjesë të një marrëveshjeje konfidenciale për të shmangur kërcënimin e një padie që ai e përshkroi si një padi të pabazuar, ka thënë Palatore, shkruan ap.

Raporti i policisë prej 22 faqesh ofron detaje mbi një akuzë për sulm seksual nga Pete Hegseth në vitin 2017, të cilën ai e mohon. Gruaja, që nuk është identifikuar, tha se Hegseth i mori telefonin dhe bllokoi derën e dhomës së hotelit, duke e penguar të largohej. Ajo raporton se mund të ishte droguar dhe nuk mbante mend shumë për ngjarjen.

Hetuesit u njoftuan nga një infermiere që i kërkoi ekzaminim për sulm seksual, dhe gruas iu morën provat. Ajo tha se ishte sulmuar nga Hegseth, ndërkohë që ai mohoi çdo akt të pahijshëm dhe e konsideroi takimin të dakorduar.

Pas hetimeve, Hegseth dhe gruaja arritën një marrëveshje konfidenciale, pa ngritur akuza, pasi ai ishte i shqetësuar për mundësinë e një padie që mund të çonte në largimin e tij nga Fox News. /Telegrafi/