Edhe Google synon Waze, për 1 miliard dollarë

Google, krijuesi i sistemit operativ Android, është duke e konsideruar blerjen e shërbimit mobil të hartave, aplikacionin Waze, dhe me interesimin e saj ajo ka filluar “një luftë” të mundshme me Facebook, pasi që edhe kjo e fundit është duke synuar të hyjë në marrëveshje me kompaninë, për ta përvetësuar atë, thuhet sipas burimeve të afërta me çështjen.

Waze ka ngritur një interesim të jashtëzakonshëm nga palë të shumta, dhe për ta shitur biznesin e saj kompania është duke kërkuar më shumë se 1 miliard dollarë, thuhet sipas një zyrtari brenda kompanisë, i cili kërkoi të mos identifikohet për shkak se bisedimet janë private.

Kompania me bazë në Palo Alto, Waze, gjithashtu mund të mbetet e pavarur, dhe të kërkojë financime të reja të kapitalit, në vend të vendimit për tu shitur.

Ndërsa, konsumatorët gjithnjë e më shumë po fokusohen në drejtim të pajisjeve mobile, dhe vazhdojnë të qëndrojnë sa më larg nga laptopët dhe dhe kompjuterët personal, kompanitë e reja si Facebook, Google dhe kompanitë e tjera janë duke i përforcuar përpjekjet për ta zgjeruar biznesin e tyre edhe në hapësirën mobile. / Telegrafi /