Drejtoria e Arsimit në Prizren ka bërë të ditur se ka për synim përfshirjen e fëmijëve në edukimin e hershëm dhe se për këtë arsye ka paraqitur disa kërkesa në Ministrinë e Arsimit, Shkencës, Teknologjisë dhe Inovacionit për ndërtimin e çerdheve të reja.
Sipas drejtuesve të këtij dikasteri komunal, këto kërkesa nuk janë miratuar nga niveli qendror.
“Komuna e Prizrenit respektivisht DKA ka bërë kërkesa të vazhdueshme në MASHTI për ndërtimin e çerdheve të reja. Me MAShTI-n u patëm pajtuar që të ndërtojmë çerdhe të reja në fshatrat Zhur, Lubizhdë, Korishë dhe në lagjen “Dardania” si dhe për shqyrtimin e kërkesave për fshatrat Gjonaj e Piranë. Por duket se do të hyjmë në zgjedhje parlamentare pa u nisur së ndërtuari asnjëra nga këto çerdhe”, ka thënë drejtoresha e Arsimit, Luljeta Veselaj Gutaj.
Sipas saj, MAShTI nuk ka dhënë pëlqime për nisjen e ndërtimit në Zhur dhe në Lubizhdë, me arsyetimin se lokacioni është pjerrinë, respektivisht se ngastra është larg rrugës kryesore, raporton Telegrafi.
Ajo ka shtuar se në lagjen “Dardania” ka një vit që është vënë gur themeli dhe se MAShTI ende nuk e ka nisur ndërtimin, teksa në Korishë ngjashëm nuk është bërë asnjë hap i vetëm për ndërtimin e çerdhes.
“Pavarësisht prej vlerësimeve pozitive të ekipeve tona teknike për ndërtimin e çerdheve në lokacionet e përzgjedhura, ekipet teknike të MAShTI-t arsyetohen se lokacionet nuk janë të duhura dhe nuk japin pëlqime. I vetmi arsyetim duket se është urdhri nga lartë që këtë vit të mos jepet asnjë pëlqim, deri në zgjedhje”, ka deklaruar Veselaj Gutaj.
Zyrtarja e lartë komunale ka theksuar se lidhur me këtë çështje nuk do të dekurajohen, pasi me buxhetin vetanak kanë nisur punimet për ndërtimin e çerdhes në Lagjen e Trimave, raporton Telegrafi.
“Tashmë kemi planifikuar dhe nisur procedurat për ndërtimin e çerdhes në lagjen “Arbanë”. Planet i kemi që të nisim ndërtimin e çerdheve edhe në lokacione të tjera”, është shprehur ajo.
Në të njëjtën kohë është zotuar se Komuna e Prizrenit me buxhetin e saj do të angazhohet për rritjen e përfshirjes së fëmijëve në edukimin e hershëm, me qëllim “që të krijohen lehtësira për familjet dhe të mundësohet organizimi sa më i mirë i jetës së tyre”.
Ministrja e MAShTI-t, Arbërie Nagavci gjatë një paraqitjeje mediale ka shprehur qëndrimin se komunat kanë bërë obstruksione lidhur me projektet për ndërtimin e çerdheve të reja përkatësisht përfshirjen e fëmijëve në edukimin e hershëm.
Mirëpo Asociacioni i Komunave të Kosovës ka mohuar këtë pretendim të ministres Nagavci, duke theksuar se komunat bëjnë kërkesa të pareshtura në MAShTI për ndërtimin e çerdheve të reja.
Sipas AKK-së, edhe Komuna e Prizrenit ka bërë dhe është duke bërë kërkesa në MAShTI. “Mirëpo këto kërkesa refuzohen apo nuk miratohen”, thuhet në reagim. /Telegrafi/
