Dhjetë arsyet pse duhet shkarkuar Tovërlani

Shumëkush ka pritur që pas eliminimit turpërues të Prishtinës nga Vllaznia e Pozharanit në garat e Kupës, trajneri i saj do të shkarkohet, ose edhe do të japë vetë dorëheqje, duke marrë parasysh se në kampionat nuk i ka punët kurrqysh. Por, një gjë e tillë nuk do të ndodh të paktën edhe në dy takimet ardhshme.

Gjashtë humbje në 15 ndeshje, vendi i pestë në renditje dhe 11 pikë larg të parit, Llamkos Kosova. Eliminim turpërues nga Kupa e Kosovës, ku u mposht nga Vllaznia e Pozhoranit. Është kjo Prishtina, që po përjeton momentet më të këqija në histori të saj. Por, pavarësisht kësaj, ndryshimet në shtabin teknik nuk janë duke ndodhur. Trajneri Afrim Tovërlani nuk e ka ndërmend të shkarkohet të paktën edhe në dy ndeshjet e radhës në kampionat, e po ashtu as ai vetë nuk e ka ndërmend të japë dorëheqje. Titulli dhe Kupa të fituara në edicionin e kaluar, bënë që Tovërlani të ketë gisht të madh në suksesin e Prishtinës, por kjo nuk do të thotë se ai momentalisht nuk meriton shkarkimin. Ja 10 arsyet që i sjell gazeta Arena.

1. Eliminimi nga Kupa e Kosovës dhe për më tepër nga skuadra e Ligës së Dytë, Vllaznia e Pozharanit, është turpërimi më i madh që i ka ndodhur Prishtinës, që prej pas luftës. Cilido trajner tjetër që do të pësonte një humbje të tillë, do të dorëhiqej ose do të shkarkohej menjëherë. Prishtina u eliminua në rrethin e parë.

2. Pas 15 ndeshjeve të këtij edicioni në Superligë, Prishtina ka grumbulluar 23 pikë dhe ndodhet në vendin e pestë, tetë pikë më pak se lideri Llamkos Kosova. Ky është stinori vjeshtor ndër më të dobëtit pas luftës. Më dobët ishin në vjeshtën e 2009-ës. Gjashtë humbje ka pësuar momentalisht Prishtina. Një fitore e ka si mysafir. Sa për kujtesë, dy vjet më parë, Ramiz Krasniqi u bë kampion vjeshtor, dhe një ditë më pas u shkarkua.

3. Tovërlani dështoi në përforcime. Arsyetimi për largimin e shumë lojtarëve titullar në verë qëndron. Por, Prishtina gjatë verës ka sjell hiq më pak se 11 futbollistë. Shumica u vlerësuan talentë, kurse Tovërlani solli edhe lojtarë me goxha përvojë si Isuf Llumnica, Berat Hyseni e Mirsad Idrizi. Të tjerët që erdhën janë: Armend Thaqi (Hajvalia), Sead Miftari (Trepça), Flamur Shala (Feronikeli), Agron Gashi (Flamurtari), Qëndrim Jahaj (Istogu), Valentin Lezi (Ballkani), Bledar Hajdini (Hysi), Albert Stublla (Kurda). Shumica prej tyre përdoren për ekipin e juniorëve. Tovërlani dështoi në përforcime, pasi hiq Berat Hyseni që ka shënuar katër gola, të tjerët nuk e kanë treguar veten.

4. Tovërlani riktheu në skuadër mbrojtësin e Ferizajit, Mirsad Idrizin, të cilin e quan ‘lojtar besnik’. Në fakt, pikërisht Idrizi ishte përjashtuar katër vjet më parë nga Prishtina për bojkot të ndeshjeve, dhe zënie të sms-ve me Tovërlanin. Rikthimi i tij bëri bujë, pasi në fillim kryesia nuk ia pranonin. U desh kohë që ai të nisë stërvitjet. Ardhja e tij nuk u mirëprit as nga lojtarët. Pak kush besonte se do të ndodhë një rikthim i tij. Tovërlani largoi talentin Akil Makolli, për ta marrë dostin e tij, veteranin Idrizi.

5. Prishtina është duke e zhvilluar njërën prej lojërave më të dobëta. Loja e saj nuk është e ngjashme me të kaluarat. Tifozët e Prishtinës nuk meritojnë lojë të tillë, si në fushën e vet, ashtu edhe mysafir. Plisat nuk janë mësuar me fitore 1:0.

6. Atmosfera te Prishtina nuk është gjithmonë e mirë. Së fundi ai u kap me lojtarin Gentrit Begolli. Ndërkohë, pas humbjeve ai akuzon vetëm lojtarët dhe përgjegjësinë nuk e ka marrë asnjëherë vetë. Ndaj lojtarëve shpesh herë përdorë edhe fjalë fyese.

7. Prishtinës i kanë humbur edhe tifozët. Në ndeshjet e fundit nuk u grumbulluan më shumë se 300-400 shikues.

8. Prishtina nuk e ka përtërirë ekipin, siç premtonte Tovërlani. Vetëm dy-tre lojtarë të rinj, madje nën moshën 22-vjeçare luajnë titullar. Sikur të aktivizonte më shumë talentët, do të kishte arsye për rezultatet. Madje, ai nuk e aktivizon në ndeshje kampionate, talentin më të madh të Prishtinës, Lorik Aliu. Këtij ia dha rastin vetëm në Kupë, kurse në ndeshje kampionate rrallë e merr në 18-she. Ai po luan me juniorët.

9. Tovërlani e ka rrogën mbi 1 mijë euro në muaj, rreth tre fish më shumë se e lojtarëve. Pikërisht kjo pagë e tij është madhore për rezultatet që po përjeton Prishtina. Ai ka kontratë tri vjet e gjysmë, prandaj kryesia mund të hezitojë ta shkarkojë atë, pasi duhet dhënë pagë mujore.

10. Trajneri prishtinas u gjend dy herë në procedurë disiplinore dhe atë për deklaratat e tij. Fillimisht e quajti trajnerin e Ferizajt, Bylbyl Sokoli, Orl, e më pas u dënua me 300 euro për deklaratat e tij pas ndeshjes Trepça – Prishtina. Klubi më i madh në vend, nuk meriton një trajner që gjendet shpesh herë në disiplinor. /Arena/Telegrafi/