Dështon ndërtimi i xhamisë së re në Shtime, kryetari Aliu u kishte premtuar mbështetje “hoxhallarëve”

Kuvendi i Komunës së Shtimes në mbledhjen e mbajtur me datë 29 nëntor të vitit 2024, pati miratuar vendimin e ekzekutivit për ndarjen e 20 ari truall per ndertimin e Xhamisë së re në Shtime. Por Ministria e Administrimit të Pushtetit Lokal ka konstatuar se vendimi i nxjerrë nga ky kuvend është në kundërshtim me nenin 21 të Ligjit Nr. 06/L-092 për dhënien në shfrytëzim dhe këmbimin e pronës së paluajtshme të Komunës dhe në nenin 24 të Rregullores (QRK) – Nr.09/2020 për përcaktimin e procedurave të dhënies në Shfrytëzim dhe Këmbimin e pronës së paluajtshme të Komunës.

Ky ligj sipas MAPL-së nuk parasheh dhënien e pronës komunale për raste te tilla.

Ekzekutivi i Komunës së Shtimes në mbledhjen e fundit të Kuvendit Komunal ditë më parë nuk e ka prezantuar para kuvendarëve këtë vendim ashtu siç rekomandon MAPL-ja që Kuvendi Komunal duhet të ndërmerr veprime brenda afatit ligjor, prej 30 ditëve dhe të harmonizoj aktin me legjislacionin në fuqi.

Kryetari i kësaj komune Qemajl Aliu, u kishte premtuar mbështetje Këshillit të Bashkësisë Islame lidhur me këtë projekt, por MAPL-ja kishte vepruar sipas legjislacionit në fuqi lidhur me këtë vendim të Kuvendit.

Në vendimin e MAPL-së të cilin e ka siguruar Telegrafi, midis të tjerash thuhet se ligji Nr.06/092 për dhënien në shfrytëzim dhe këmbimin e pronës së paluajtshme të komunës ka për qellim rritjen e vlerës së pronës së paluajtshme të komunës si dhe zhvillimin e qëndrueshëm ekonomik.

“Vendimi Npi-01/385 për ndarjen e 20 ari truall për ndërtimin e Xhamisë në Shtime i miratuar më datë: 29.11.2024, i parashtruar për shqyrtim në MAPL më datë: 04.12.2024, Ministria e Administrimit të Pushtetit Lokal, pas shqyrtimit të përmbajtjes së aktit të komunës si më sipër, vlerëson se akti i komunës nuk është në pajtim me dispozitat e legjislacionit në fuqi. Kuvendi i Komunës së Shtimes, duhet të ndërmerr veprime dhe brenda afatit ligjor, prej 30 ditëve, të rishqyrtoj dhe të harmonizoj aktin me legjislacionin në fuqi. Ministria e Administrimit te Pushtetit Lokal, mbetet në dispozicion të komunës për çfarëdo sqarimi të mëtejshëm lidhur me këtë vlerësim”, thuhet midis të tjerash në vendimin e MAPL-së.

Sipas MAPL-së, vendimi është nxjerrë në pajtim me Rregulloren e Qeverisë së Republikës së Kosovës Nr. 10/2019 për Shqyrtimin Administrativ të Akteve të Komunave, si dhe Rregulloren nr. 06/2021 për ndryshim-plotësimin e Rregullores (QRK) Nr. 10/2019, për Shqyrtimin Administrativ të Akteve të Komunave dhe ligjeve të tjera bazike. 

Në anën tjetër Komuna e Shtimes e as drejtori i Urbanizmit Grejtalb Emini, nuk u janë përgjigjur pyetjeve të Telegrafit, lidhur me këtë çështje.

Po ashtu pyetjeve e as telefonatave nuk u është përgjigjur as kryetari i Këshillit të Bashkësisë Islame në Shtime, Skender Baftiu.

Por, burime të Telegrafit, në Komunën e Shtimes, kanë thënë se kryetari Qemajl Aliu u kishte premtuar mbështetje “hoxhollarëve” për realizimin e këtij projekti.

“Këshilli i Bashkësisë Islame kanë qenë në Komunë lidhur me këtë projekt derisa është marrë vendimi në Kuvend për ndarjen e parcelës dhe kryetari Aliu u kishte premtuar mbështetje “Hoxhollarëve” për realizimin e projektit. Por, deri më tash ky vendim nuk është përmendur nga askush se ai është kthyer i kundërligjshëm nga MAPL-ja. Nuk e dimë as arsyeje pse është mbajtur i “fshehur” për kuvendarët ky vendim deri më tash”, ka thënë ky burim. /Telegrafi/