Deputetët kundër fertilizmit artificial, kritikohen nga mjekët e aktivistët

Për herë të tretë ka dështuar në Kuvend votimi në parim i Projektligjit për Shëndet Riprodhues dhe Fertilizim të Asistuar Mjekësor.

Ai do të t’ua mundësonte grave që operacionin për fekondim artificial ta kryenin pa pagesë në QKUK.

Por, projektligji që e hapë këtë rrugë, në Kuvend mori pak se 60 vota.

Gjinekologu Curr Gjocaj, që ishte pjesë e komisionit punues të këtij projektligji, po thotë se në klinikë gjithçka është gati për kryerjen e atij operacioni, derisa pret mirëkuptim nga deputetët kundërshtues.

“Çka është më e mira përmes këtij ligj që do të mundësohej që edhe sektori publik mund ta ofronte këtë, por nuk e di sa është i informuar opinion publik ne kemi përparu shumë dhe aty në klinikë është një repart që po funksionon në mënyrën më të mirë të mundshme dhe vetëm po prisnim ligjin që gjithçka të fillonte. Por tashmë ngecëm tek ligji e shpresoj që të tejkalohen pakënaqësitë tek një grup i deputetëve”, tha Gjocaj.

Lexo po ashtu Dështon për të tretën herë miratimi i Projektligjit për Shëndetin riprodhues

Ndërsa, aktivistë të shoqërisë civile po konsiderojnë që është e padrejtë t’u ndalohet një gjë e tillë grave të cilat kanë dëshirë të bëhen nëna.

“Unë mendoj që është shumë e keqe kjo për gratë të cilat s’mundem me bo fëmijë. Ato kanë me gjetë mënyra tjera me bo fekondimin po unë nuk po e kuptoj pse po votohet kundër sepse kjo sa ja lehtëson atyre që mos me shku në klinika private, po me pas mundësi edhe në të shtetit ku pagesa është edhe më e vogël”, tha Neri Ferizi, aktiviste.

Televizioni ka kuptuar që ky operacion në klinika private kushton deri më 20 mijë euro. /Dukagjini/