Sulmuesi uruguaian, Darwin Nunez, nuk është i kënaqur me atë që po tregon te Liverpooli edhe pse para gjashtë muajsh u transferuar nga Benfica për shumën e 95 milionë eurove.
Ambientimi i 23-vjeçarit me futbollin anglez nuk ka shkuar sipas parashikimeve dhe ai është përballur shpeshherë me kritika, edhe pse ka qenë nën mbrojtjen e trajnerit Jurgen Klopp.
Nunez foli për Sky Sports, duke e pranuar që nuk po luan mirë dhe se i duhet ende të përmirësohet.
“Mendoj se nuk po luaj mirë në këtë moment, megjithatë çdo ditë në stërvitje unë mundohem të përmirësohem. Klopp e di mirë se pika ime e fortë është shpejtësia dhe lëvizjet në hapësirat e zbrazëta”.
“Por, ai gjithnjë më thotë se në fushë duhet të jem i qetë dhe të lëvizë më shumë sepse jam një lojtar me kualitet”.
“Këtë kërkon më së shumti, pa harruar sigurisht edhe golat. Kërkon qetësinë sepse nëse godas me inat atëherë shkon keq”, ka thënë Nunez. /Telegrafi/