Danimarka mund të lejojë trupat amerikane në tokën e saj

Danimarka thotë se do të fillojë negociatat për një marrëveshje të re bashkëpunimi në fushën e mbrojtjes me SHBA-në, e cila mund të përfshijë lejimin e trupave dhe pajisjeve ushtarake amerikane që të vendosen në tokën daneze – në ndryshim të një politike të vjetër dekadash.

Por kryeministrja daneze Mette Frederiksen u theksoi gazetarëve të enjten se masa nuk është për shkak të tensioneve aktuale midis Rusisë dhe Ukrainës, shkruajnë mediat e huaja, përcjell Telegrafi.

Ajo tha se bisedimet për intensifikimin e bashkëpunimit ushtarak midis Kopenhagës dhe Uashingtonit janë duke u zhvilluar për një kohë të gjatë.

Marrëveshja e re potenciale e bashkëpunimit të mbrojtjes danezo-amerikane “është një përparim pas shumë dekadash” të një politike kundër lejimit të vendosjes së trupave të huaja në tokën daneze, tha ajo për mediat daneze.

“Një angazhim i shtuar amerikan këtu në Danimarkë do të përmirësojë qasjen e Shteteve të Bashkuara në kontinentin evropian”, ka theksuar tutje Frederiksen, siç citohet nga transmetuesi publik danez DR.

Ministri danez i Mbrojtjes Morten Boedskov u tha gazetarëve se nuk do të krijohej asnjë bazë ushtarake amerikane në Danimarkë dhe ai nuk pranoi të komentonte se ku do të vendoseshin trupat amerikane në vend.

Transmetuesi danez TV2 tha se qeveria daneze po kërkon të arrijë një lloj marrëveshjeje të ngjashme të mbrojtjes me Uashingtonin siç bëri Norvegjia fqinje në maj të vitit 2021. Të dy vendet skandinave janë aleatë të vendosur të NATO-s të SHBA-së.

Me traktatin e saj me Uashingtonin, Norvegjia ka lejuar qasje të papenguar për trupat amerikane që mund të lëvizin lirshëm brenda dhe jashtë vendit. Megjithatë, ata duhet të respektojnë ligjin norvegjez, që do të thotë – ndër të tjera – që SHBA nuk mund të dërgojë armë bërthamore, mina tokësore ose bomba thërrmuese me ushtarët e saj në tokën norvegjeze. /Telegrafi/