Çfarë risi prezantoi Facebook në konferencën e zhvilluesve F8?

Në konferencën e zhvilluesve të rrjetit social Facebook, të njohur si “F8 conference” gjiganti amerikan i teknologjisë është fokusuar tek zhvilluesit dhe ofrimin e funksioneve dhe specifikave të reja në rrjetin social.

Për zhvilluesit, Facebook ka sjell një mori funksionesh të reja, ndërsa përdoruesit e thjeshtë mund ta vërejnë së paku një ndryshim të rëndësishëm – përdorimin e aplikacioneve të Facebook edhe në mënyrë anonime.

Në fjalimin e tij, themeluesi dhe drejtori ekzekutiv i Facebook, Mark Zuckerberg ka thënë se qëllimi i Facebook për zhvilluesit është që t’ua mundësojë atyre t’i krijojnë, rrisin dhe monetizojnë aplikacionet e tyre.

Në mesin e karakteristikave të shumta të prezantuar në konferencë, përfshihen edhe opsionet sikurse qasja anonime në aplikacionet e palëve të treta në Facebook, veglat e reja pë zhvilluesit të cilat janë pjesë e programit FBStart, i cili i përkrah zhviluesit me reklamim në rrjetin social deri në 30,000 dollarë dhe u jep atyre mbështetje teknike për aplikacionet e tyre.

Përmes Audience Network, Facebook u mundëson zhvilluesve ti integrojnë reklamat e saj në aplikacionet e palëve të treta, ndërsa rrjeti social ka prezantuar edhe butonin “Like” për versionin mobil, i cili gjithashtu mund të integrohet në aplikacione.

Më pas, Facebook u ka dhënë mundësi zhvilluesve të kenë qasje në programin Parse për memorie të jashtme, dhe mundësi që aplikacionet e tyre të përdoren edhe pa internet. Ndërsa me AppLinks, Facebook ka mundësuar që aplikacionet e ndryshme të mund të përdoren paralelisht.

Në fund, Facebook njoftoi se F8 do të jetë një ngjarje tradicionale vjetore, e cila do të mbahet në Fort Mason. / Telegrafi /