Çfarë pas dorëheqjes së BDI-së?

Paqartësi hasim në kumtesën e Bashkimit Demokratik për Integrim, e cila kishte për qëllim dhe detyrim ndaj opinionit të shpjegojë se pse pesë ministrat e kësaj partie sot dhanë dorëheqje nga funksionet e tyre në Qeverinë e Maqedonisë.

Nga kjo që BDI në një kumtesë të gjatë e sqaron, mund të kuptohet se kjo parti është e revoltuar dhe paraqitet viktimë nga mosveprimi i duhur institucional për të:

zbardhur krimet, korrupsionin si dhe përcaktimin e përgjegjësisë për çdo keqbërje – duke u bazuar në mijëra përgjimet e paligjshme të cilat për hir të së vërtetës dhe sipas Prokurorisë Publike Speciale (PSP) janë bërë nga vet funksionarë të Maqedonisë;
për të parandaluar shpërndarjen e materialeve në duar të kriminelëve të cilët më pas kanë ri-montuar dhe falsifikuar ato me qëllim shantazhimi të funksionarëve të BDI-së.

Pasi që BDI distancohet nga kriza dhe shpallet viktimë nga ky keq-menaxhim institucional thotë që ka tërhequr ministrat nga Qeveria, duke mos toleruar kështu: degjenerim të mëtejmë të procesit, cenim të gjykimit të sovranit, instalim në skenën të poltronistëve të nëntokës.

Portalb kërkoi sqarim konkret nga kjo parti:

Si nuk do të lejojnë degjenerimin e mëtejmë të procesit?
Cilat janë hapat e ardhshme të partisë?
A është BDI për Qeveri ekspertësh?
Mos vallë do të emërtohen ministra të rinj?
Cili është qëndrimi i BDI-së për zgjedhjet e 5 qershorit, do të marrin apo jo pjesë në to?
Kërkuam sqarim edhe për këtë paragraf:
“Por, për arsye të së mirës së përbashkët të shoqërisë, procesin e reformimit sistemor do ta çojmë deri në fund sepse vetëm zbatimi i reformave e bën këtë vend më të qëndrueshëm dhe jo peng të fabrikantëve dhe krimineleve në nëntokë dhe në politikë.”
Për çfarë reformimi flitet kur BDI qartë thotë që procesi është i komprometuar?
Si mendon ta çojë kjo parti deri në fund këtë proces?
A kanë marrëveshje me VMRO-në për të betonuar datën e zgjedhjeve me 5 qershor?
A është ky vendim me konsultën e ndërkombëtareve- garantues të Marrëveshjes së Përzhinës?
BDI kërkon veprim nga Prokuroria dhe Ministria e Brendshme, të arrestohen falsifikuesit ndërsa paralajmëron dalje nga kontrolli të situatës me fjalët ”nuk merr asnjë përgjegjësi të vetme për daljen e situatës nga kontrolli institucional dhe mundësisë së zbatimit individual të gjyqësisë dhe drejtësisë.”

Në këtë lind pyetja, tani funksionarët e BDI-së mund të dalin nga kontrolli duke marrë masa më radikale?
Më tej, BDI thotë që nuk ka krim dhe keqpërdorim të detyrës nga ana e funksionarëve të saj prandaj dalin në pah këto biseda të fabrikuara që sipas tyre bëhen nga “qarqe të caktuara që nuk ia duan të mirën BDI-së, si mjet i fundit për ta luftuar besimin e palëkundur të shqiptarëve ndaj BDI-së dhe për ta dobësuar faktorin politik shqiptar në Maqedoni”.

Nga Qendra për informim të BDI-së thanë që në ditët në vijim do të japin më shumë detaje ndërsa sot do të mbesin pas asaj që është thënë në komunikatë. /Telegrafi/