Cacttus Education në partneritet me USAID ofrojnë 20 bursa për studim

Shkolla profesionale Cacttus Education ka arritur marrëveshje bashkëpunimi me USAID për lansimin e projektit “Partneriteti për Impaktin në TIK”. Ky projekt vjen si kërkesë e tregut për profesionistë të TIK-ut dhe si nevojë për krijimin e fuqive të reja punëtore në këtë fushë. Projekti ka për qëllim që të ju ofroj studentëve njohuri dhe shkathtësi që i plotësojnë kërkesat e tregut të punës, veçanërisht për sektorin privat. Përmes këtyre shkathtësive që ofrohen në veçanti në fushën e teknologjisë informative (TIK), synohet që të plotësohen mangësitë e kësaj fushe në tregun e punës që paraqiten dukshëm si rrjedhojë e sistemit të arsimit në Kosovë.

“Partneriteti për Impaktin në TIK” parasheh dy forma të modeleve për trajnimin e të rinjve. Njëra fokusohet në lehtësimin e mundësive të vetë-punësimit përmes ideve start-up nga brenda dhe jashtë, sipërmarrjes dhe mundësive të jashtme (outsourcing). Forma tjetër është ofrimi i aftësive dhe trajnimeve profesionale të nevojshme të kombinuara me punësim direkt përmes punëve praktike dhe vendeve të punës në kompani të ndryshme kosovare, disa prej të cilave tashmë janë partnerë që e mbështesin këtë projekt.

Cacttus Education si shkolla e parë profesionale e nivelit të 5-të e dedikuar për teknologji informative, synon ta plotësojë mungesën e shkathtësive specifike të lidhura me tregun e punës dhe si rrjedhojë ta zvogëlojë hendekun e periudhës mes përfundimit të shkollimit dhe angazhimit në punë.

Për të arritur qëllimet e këtij projekti, njeri prej tyre aftësimi për punë përmes shkollimit profesional, Cacttus Education në partneritet me USAID ofron 20 bursa që mbulojnë 80% të studimeve në fushën e teknologjisë së informacionit. Përmes këtyre bursave 20 studentë mund tëstudiojnë në dy drejtimet më të kërkuara në tregun vendor dhe të huaj: “Zhvillim i ueb-it dhe aplikacioneve mobile” dhe “Administrim i rrjeteve dhe sistemeve”.Te gjithë te interesuarit për të përfituar nga kjo mundësi inkurajohen të kontaktojnë Cacttus Education për informata të mëtutjeshme rreth procesit.

Klikoni KËTU për më shumë informata rreth bursës. /Telegrafi/