Bujar Osmani: Po bëjmë përpjekje për rrumbullakimin e ndryshimeve kushtetuese

Në kuadër të vizitës së punës në Bruksel, Ministri i Punëve të Jashtme, Bujar Osmani, sot zhvilloi takime të ndara me kryetarët e dy grupeve më të mëdha politike në Parlamentin Evropian, me Iraçe Garsia Perez, nga Aleanca Progresive e Socialistëve dhe Demokratëve dhe me Manfred Ueber nga Partia Popullore Evropiane, njoftojnë nga MPJ.

Osmani, theksojnë nga MPJ, e rikonfirmoi pozitën e shtetit si partner i përgjegjshëm dhe i besueshëm i BE-së dhe NATO-s, duke u harmonizuar plotësisht me Politikën e Përbashkët të Jashtme dhe të Sigurisë të BE-së, me mbështetje të plotë për Ukrainën.

“Duke iu referuar rrjedhës së suksesshme të skriningut, Osmani theksoi se Qeveria po bën përpjekje maksimale për rrumbullakimin e ndryshimeve kushtetuese si angazhim i ynë, me qëllim që të hapet Klasteri i Parë Fundamente deri në fund të këtij viti dhe dinamizmi i procesit të aderimit, gjë për të cilin bashkëbiseduesit premtuan mbështetje të fortë ashtu si edhe deri më tani.

Ministri theksoi se në rrugën drejt anëtarësimit të plotë në BE nevojiten përfitime afatshkurtra të dukshme dhe të prekshme përmes integrimit të përshpejtuar të shtetit, që do të mundësojë afrim më të madh në kuptimin politik, social dhe mbi të gjitha në atë ekonomik.

Në takime u bë fjalë edhe për dinamikën rajonale dhe kontributin e vendit tonë në stabilitetin rajonal dhe kulturën e dialogut me qëllim forcimin e sigurisë rajonale, thellimin e marrëdhënieve të mira fqinjësore dhe avancimin e bashkëpunimit rajonal”, thuhet në deklaratën e MPJ-së./Telegrafi/