Boçvarski: Sistemet inteligjente, kthesë paradigmatike për zhvillimin e infrastrukturës së transportit

Ministri i Transportit dhe Lidhjeve, Bllagoj Boçvarski, së bashku me ministrat e Transportit dhe Infrastrukturës nga vendet e Ballkanit Perëndimor, ka nënshkruar një Deklaratë të Përbashkët për Implementimin e Sistemeve Inteligjente të Transportit.

Me këtë deklaratë, vendet e Ballkanit Perëndimor angazhohen për integrimin e sistemeve inteligjente në trafikun hekurudhor dhe rrugor të korridoreve evropiane, duke e bërë këtë një parakusht për një transport më efikas.

Ministri Boçvarski ka vënë në dukje se zhvillimi dhe implementimi i këtyre sistemeve janë thelbësor për modernizimin e rrjeteve të transportit sipas standardeve evropiane. Ai ka theksuar se përqendrimi i plotë i Maqedonisë së Veriut në këtë fushë është në linjë me objektivat e tyre për modernizimin e korridoreve përmes sistemeve të Transportit Inteligjent (ITS).

Në kuadër të kësaj iniciative, Qeveria ka aprovuar Strategjinë Kombëtare për Sistemet Inteligjente të Transportit 2023-2032. Ky dokument përfshin synimet dhe planet për implementimin e këtyre sistemeve në periudhën deri në vitin 2030.

“Në tremujorin e parë të vitit 2024, pres që të zgjedh kontraktorin dhe të fillojë me implementimin e sistemeve të ITS përgjatë Korridorit 10, nga Velesi deri në pikën kufitare Bogorodicë dhe në fazën e dytë t’i instaloj nga Velesi deri në pikën kufitare Tabanovc. Këtu përfshihet instalimi i sistemeve të menaxhimit të trafikut, përkatësisht tabelave me përmbajtje të ndryshueshme, sistemi me kamera numërimi, sistemi i kategorizimit të automjeteve, stacionet meteorologjike për monitorimin e kushteve të motit dhe qendra rajonale e kontrollit për ITS”, tha ministri Boçvarski.

Ky projekt përfshin shumë aspekte të sistemeve të ITS, duke përfshirë tabelat me përmbajtje të ndryshueshme, sistemin me kamera numërimi, sistemin e kategorizimit të automjeteve, stacionet meteorologjike për monitorimin e kushteve të motit dhe qendra rajonale e kontrollit për ITS.

Në përfundim, Ministri Boçvarski theksoi në një panel për sistemet e ITS se përdorimi i teknologjive informative dhe komunikuese në infrastrukturën e transportit do të kontribuojë në sigurinë, efikasitetin dhe qëndrueshmërinë e transportit në rajon. /Telegrafi/