Askush nuk udhëzon qytetarët për shmangie nga aktet terroriste (Video)

Pas sulmeve terroriste në Evropë, sidomos në Bruksel shumë pelegrinë kanë anuluar udhëtimet e tyre të planifikuara për në Romë, për shkak të dhunës në Bruksel.

E përderisa vendet tjera japin udhëzime se si të shmangen nga sulmet terroriste, nga tubimet në vende publike, në Kosovë ende nuk është përgatitur një udhëzim i tillë për qytetarët.

Se një udhëzim i tillë është i nevojshëm e ka pohuar Nuredin Ibishi, anëtar në Komisionin Parlamentar për Punë të Brendshme, Siguri dhe Mbikëqyrjen e Forcës së Sigurisë së Kosovës.

Ndërkaq, sipas Bashkim Selmanit , profesor ne Universitet te Tetovës për terrorizmin, Kosova deri më tani ka një strategji se si të drejtohet në raste të terrorizmit, por që sipas tij dimensioni real duhet të ndahet në tri faza.

“Faza e parë ka të bëjë me përgatitjen institucionale, e dyta me lëvizjen e qytetarëve ku ka organizime dhe e treta ka të bëjë me mënyrën funksionale të të gjitha bashkësive. Ballkani tani duhet të jetë pikë shënjestër e sulmeve në një forma apo tjetër. Edhe Kosova nuk është e parrezikuar në këtë drejtim por duhet të ketë bashkëpunim mes tri organeve , policia, qytetarët por edhe institucionet e tjera në këtë proces”, thotë ai për Tribuna Channel.

Ndërsa, njohësi i çështjeve të sigurisë, Avni Islami, thotë që qytetarët nuk duhet të frikësohen nga aktet e tilla.

“Unë e kam një mesazh për qytetarët e Kosovës që mos të frikësohen nga aktet të tilla sepse Kosova nuk është në hartat goditëse të ISIS-it, e madje edhe po të kishte ide të tilla, janë vetë luftëtarët shqiptar të ‘xhihadi’ që nuk do të lejonin sulme të tilla në vendin tonë, duke e ditur se në luftën e fundit populli ynë ka përjetuar: terrorizëm, masakra e çka jo tjetër”. thotë Islami për Tribuna Channel.