Arrestohet i dyshuari për vrasje në tentativë në Mitrovicë

Policia e Kosovës ka bërë të ditur se ka arrestuar një të dyshuar për vrasjen në tentativë, që ndodhi të premten në mbrëmje në Mitrovicë.

Lidhur me rastin, në cilësi të provave materiale në vendin e ngjarjes  janë gjetur dhe konfiskuar  dy gëzhoja.

“Vepra penale ka ndodhur mbrëmë rreth orës 21:45,  në rrugën “Shaban Polluzha” në Mitrovicë, ku nga një veturë në lëvizje është shtënë me armë zjarri  në drejtim të veturës së ankuesit dhe ishte larguar në drejtim të panjohur. Përveç dëmeve materiale në veturën e ankuesit nuk raportohet për persona të lënduar”, thuhet në njoftim.

Ndërsa, si rezultat i ndërveprimeve policore pas dy orëve nga njësia policore e Trafikut Rrugor në zonën e Skenderajt është identifikuar dhe arrestuar i dyshuari V. J., 22 vjeçar, tek i cili është gjetur dhe sekuestruar një armë e llojit pistoletë e cila dyshohet të jetë përdor në veprën penale.

Pas intervistimit me vendim të prokurorit të rastit të dyshuarit i është caktuar masa e ndalimit për 48 orë. /Telegrafi/