“Arkitektura më e bukur fetare në botë” – Xhamia e Elbasanit merr çmimin e parë

Xhamia e Ballies në Elbasan ka marrë çmimin e parë për “Arkitekturën më të bukur fetare në botë” në garën ndërkombëtare “Building of the Year 2025” të organizuar nga “ArchDaily”, platforma më e madhe globale për arkitekturë dhe dizajn.

Kjo xhami e ndërtuar në vitin 1608 e shembur gjatë diktaturës dhe e rindërtuar në 2022 është një nga objektet e kultit me vlera unike. Hartuesit janë kujdesur të ndërthurin arkitekturën tradicionale islame me elementet moderne, duke krijuar një hapësirë frymëzuese për besimtarët dhe një vepër arti arkitekturore të jashtëzakonshme.

“Ne kemi dashur që të interpretojmë dimensionin e kohës si një koncept shumë të rëndësishëm ne parimet islame, nëpërmjet elementeve të ndryshëm dhe nëpërmjet ndjesisë që përçon çdo besimtarë në kohën që ai shpenzon ne ketë xhami. Kemi dashur që te interpretojmë kohën me materialet që kemi përdorur ne ketë xhami, si në ato materiale që kemi përdor ne ambientet e brendshme ashtu dhe  jashtë. Si bakri një element i cili me kalimin e kohës fiton me shumë dinjitet, që duke kaluar procese kimike behet me i hijshëm”, thotë Jurtin Hajro, arkitekt.

Xhamia Ballies ndërtuar nga Hasan Balliu, është e njohur edhe si “xhamia blu” për bukurinë dhe madhështinë që ka pasur, sidomos minarenë e saj, e cila ka pasur një model dekorativ origjinal që ishte i veçantë për kohën. Pas shumë vitesh, Xhamia e Ballies është ringritur në një version të ri dhe më madhështor, duke ruajtur dhe përforcuar identitetin e saj.

“Xhamia Ballies është një nga xhamitë me të vjetra të Elbasanit, por për të ardhur keq si të gjitha objektet e kultit u shkatërrua nga sistemi komunist atëherë. Por fale zotit falë përpjekjeve tona u rindërtua po ne ketë vend ku ka qene xhamia Ballies.  Dhe ajo që na gëzon më shumë është që duke qene xhamia Ballies ka qene një nga xhamitë me te bukura, ne fituam këtë çmim si xhamia me e bukur në rang botëror. Kjo është një krenari dhe respekt”, shprehet Agim Duka, Myftiu i Elbasanit.

Si i vetmi objekt kulti në Evropë që ka fituar këtë çmim, xhamia tashmë është vendosur në qendër të vëmendjes ndërkombëtare, duke dëshmuar se trashëgimia dhe arkitektura shqiptare kanë një vend të rëndësishëm në skenën globale./Euronews Albania