Apple iPad Pro vjen më 11 nëntor?

Tableti i shumë-përfolur i Apple me ekran të madh, iPad Pro do të shfaqet në dyqanet e Apple por edhe për shitje online të mërkurën, më 11 nëntor, raporton 9to5Mac.

Apple deri tani ka qenë e heshtur për datën e lëshimit të tabletit të saj të madh, duke dhënë vetëm një datë të përgjithshme me muajin nëntor si afatin kohor kur do ta shohim iPad Pro në treg.

Thashethemet e mëparshme sugjeronin se iPad Pro do të dalë në shitje në fillim të nëntorit, apo ndoshta edhe gjatë javës së parë të muajit, por planet e Apple për lansimin e këtij tableti të ri mund të zhvendosen sërish.

Nuk është e qartë nëse kompania do të ofrojë opsionin me para-porosi për pajisjen e saj më të re, apo data zyrtare e fillimit të shitjes së modelit të tabletit Pro do të mbetet dita e mërkurë, më 11 nëntor.

Bashkë me iPad Pro, Apple pritet të fillojë edhe me ofrimin e aksesorëve të tabletit, sikurse Apple Pencil dhe Apple Smart Keyboard.

Më tej është thënë se iPad Pro do të kushtojë 799 dollarë për variantin me 32GB dhe vetëm Wi-Fi, ndërsa versioni tjetër që kushton 1,079 dollarë do të ofrojë 128GB Wi-Fi + rrjetin mobil.

Apple Pencil dhe Smart Keyboard do të shiten ndaras, për 99 dhe 169 dollarë, respektivisht. (Telegrafi)