Vivian Jenna Wilson, vajza transgjinore e Elon Musk, tërhoqi vëmendjen në Javën e Modës në New York duke parakaluar për CHRISHABANA me një fustan metalik avangardë të përbërë nga gjilpëra argjendi dhe hallka zinxhiri.
21-vjeçarja u shfaq e sigurt dhe plot vetëbesim, vetëm një ditë pasi debutoi me një fustan të kuq me mbishkrimin “Miss South Carolina” për shfaqjen e Alexis Bittar.
Suksesi i saj në pasarela vjen në një kohë kur marrëdhëniet me të atin janë tejet të tensionuara, shkruan DailyMail.
Që prej tranzicionit gjinor në vitin 2022, Vivian ka ndërprerë çdo lidhje me Musk, i cili publikisht e ka kritikuar dhe e ka quajtur “viktimë e virusit të mendjes së zgjuar”. Ajo nga ana e saj e ka sulmuar në rrjete sociale dhe e ka cilësuar si një “fëmijë burrë i mjerë”.
Në një intervistë për The Cut, Wilson tregoi se jeton thjesht në Los Angeles me tre shoqe dhome, duke theksuar se nuk ka mbështetje financiare nga babai i saj, i cili vlerësohet me pasuri prej mbi 400 miliardë dollarësh (afërsisht 372 miliardë euro).
“Njerëzit mendojnë se jam e pasur, por unë nuk kam qindra mijëra dollarë. Jetoj si shumica e të rinjve të moshës sime”, tha ajo, duke shtuar se ende po mendon nëse mund ta përballojë kolegjin.
Vivian është fëmija më i madh i Musk dhe ish-bashkëshortes së tij, Justine Wilson, mbiemrin e së cilës ajo e ka marrë pas ndryshimit të identitetit.
Pavarësisht sfidave personale dhe konflikteve familjare, ajo po e gjen vendin e saj në botën e modës, duke u shfaqur si një figurë e guximshme dhe e pavarur. /Telegrafi/
