Spastrim politik në Kinë, partia përjashton nëntë gjeneralë të lartë

Partia Komuniste Kineze ka përjashtuar nëntë gjeneralë të lartë në një nga goditjet e saj më të mëdha publike ndaj ushtrisë në dekada.

Nëntë burra dyshoheshin për krime të rënda financiare, thuhet në një deklaratë të lëshuar nga ministria e mbrojtjes e Kinës.

Shumica e tyre ishin gjeneralë me tre yje dhe pjesë e Komitetit Qendror vendimmarrës të partisë.

Ata janë përjashtuar gjithashtu nga ushtria.

Ndërsa deklarata e cilësoi përjashtimin si pjesë të një fushate kundër korrupsionit, analistët thonë se kjo mund të shihet edhe si një spastrim politik.

Kjo vjen në prag të plenumit të partisë ku Komiteti Qendror do të diskutojë planin e zhvillimit ekonomik të vendit dhe do të votojë për anëtarët e rinj.

Në deklaratën e ministrisë së mbrojtjes thuhej se nëntë burrat kishin “shkelur rëndë disiplinën e partisë dhe dyshoheshin për krime të rënda që lidhen me detyrën, që përfshinin një sasi jashtëzakonisht të madhe parash, me natyrë jashtëzakonisht serioze dhe me pasoja jashtëzakonisht të dëmshme”.

Burrat tani përballen me ndjekje penale ushtarake.

Ndryshe, këto masa ndëshkuese vijnë pas spastrimeve publike në shkallë të vogël të zyrtarëve të tjerë ushtarakë në vitet e fundit, përfshirë ish-ministrat e mbrojtjes Wei Fenghe dhe Li Shangfu.

Gjeneralët më të lartë brenda Forcave Raketore u shkarkuan gjithashtu.

Një nga zëvendësuesit e tyre ishte Wang Houbin - një nga nëntë zyrtarët e përjashtuar tani nga partia.

As zyrtarët civilë nuk janë kursyer, sidomos me zhdukjen e ministrit të jashtëm Qin Gang në vitin 2023.

Njeriu që atëherë u përmend për ta zëvendësuar atë, Liu Jianchao, nuk është parë që nga korriku. /Telegrafi/