Fitorja e Sporting Lisbonës ndaj PSG-së shënoi herën e parë që klubi portugez arriti të mposhtte fituesit në fuqi të Ligës së Kampionëve, duke shkaktuar një jehonë të madhe në Alvalade dhe në sportin evropian.
Ndër shumë emra të shquar të ndeshjes – Gonçalo Inacio, Trincao, Luis Suárez – por një emër bie mbi të tjerët: Rui Borges, trajneri që mori stolin e Sporting dhe transformoi skuadrën në një forcë konkurruese.
Nga Vitória Guimarães te sfida me Sporting CP
Pak më shumë se një vit më parë, Rui Borges mori përgjegjësinë e vështirë për të zëvendësuar Ruben Amorim në krye të Sporting.
Ky emër nuk ishte rastësi; Borges kishte treguar aftësi të jashtëzakonshme në Vitória Guimaraes, ku e udhëhoqi skuadrën drejt Ligës së Konferencës, përfundoi sezonin i pamposhtur dhe u rendit i dyti vetëm pas Chelseat.
Përpara kësaj, ai kishte punuar me klube të ndryshme portugeze si Mirandela, Académico Viseu, Coimbra, Nacional, Vilafranquense, Mafra, Moreirense, duke ndërtuar një karrierë të konsoliduar.
Filozofia e punës dhe përulësia e Rui Borges, zëvendësuesit të Amorim
Në prezantimin e tij te Sporting, Borges theksoi: “Premtoj punë të palodhur dhe një qëndrim luftarak në të gjitha frontet”.
Asgjë nuk i ishte dhënë, dhe përulësia ka qenë gjithmonë gurthemeli i filozofisë së tij. Nuk është rastësi që ai vazhdon të mbajë të njëjtën orë Casio, e cila e shoqëron prej 20 vitesh, simbol i qëndrueshmërisë dhe thjeshtësisë së tij.
Konfrontimi me trashëgiminë e Amorimit nuk ishte i lehtë, pasi ndikimi i tij në Alvalade dukej i madh. Borges zgjodhi logjikën e shëndoshë, duke ruajtur strukturën e skuadrës që e kishte bërë Sporting Lisbonën të madh, në vend që të impononte stilin e tij personal. Rezultatet nuk vonuan: fitoi ligën dhe kupën, arritje që klubi nuk e kishte parë prej dekadash.
Pas marrjes së çmimit për trajnerin më të mirë të sezonit në Portugali, Borges theksoi: “Ky çmim nuk i përket vetëm Rui Borges, por të gjithë stafit të trajnerëve, lojtarëve dhe të gjithë organizatës së Sporting, e cila është një familje e madhe, e fokusuar dhe modeste. Gjithashtu, ia kam borxh një pjesë të madhe të këtij çmimi aftësisë së tifozëve tanë për të besuar në këto arritje aq sa, ose edhe më shumë se ne”.
Ndryshimet strategjike dhe rritja e lojtarëve vendas
Edhe pas largimit të lojtarëve kyç si Gyukeres, Borges nuk u ndal. Ai braktisi formacionin 3-4-2-1 të Amorimit dhe vendosi për stilin e tij të preferuar 4-2-3-1. Standardet ishin të larta, por ai nuk nguroi të jepte mundësi lojtarëve vendas si Eduardo Quaresma, Joao Simoes dhe Geovany Quenda, duke forcuar akoma më shumë lidhjen me akademinë, themelin e Sportingut.
Në këtë sezon, Sporting ka grumbulluar tashmë 42 pikë në gjysmën e parë, më shumë se 41 pikët e sezonit të kaluar. Edhe pse konkurrenca në Portugali është e fortë – me Porton që po thyen rekorde – Sporting ka bërë bujë në Europë. Ata kanë fituar çdo ndeshje në Alvalade dhe synojnë një vend në tetë vendet e para në Ligën e Kampionëve.
Fitorja ndaj Luis Enriques
Sporting Lisbona befasoi të gjithë të martën, duke mposhtur PSG-në me rezultat 2-1 me golat e Luis Suarez dhe tani me 13 pikë, aq sa ka PSG, Man City dhe Atalanta, treguan dhëmbët edhe njëherë.
Luis Enrique pas ndeshjes ishte I ashpër me lojtarët e tij dhe lojën që luajtën.
Borges, pas fitores kundër PSG-së, deklaroi se ishte fitore e madhe, përballë skuadrës më të mirë në Evropë.
“Ishte një fitore e madhe. Siguruam tre pikë shumë të vështira kundër një skuadre të shkëlqyer. U përballëm me shumë sfida, por arritëm atë që kërkova: kohezion dhe pasion. E dinim se do të vuanim kundër skuadrës më të mirë në Evropë”, deklaroi ai.
Me këtë fitore, rekordi i tij evropian arrin 14 fitore dhe një përqindje fitoresh prej 61%, ndërsa ora e tij Casio vazhdon të mbetet simbol i qetësisë dhe përulësisë së tij, duke treguar se sukseset e mëdha nuk janë të lidhura vetëm me luksin apo shfaqjen, por me disiplinën dhe strategjinë e duhur. /Telegrafi/