Rafael Leao i është ofruar Barcelonës dhe synon largimin nga Milani gjatë afatit kalimtar të verës, në kërkim të një projekti më ambicioz.
Sulmuesi 26-vjeçar ka shprehur gatishmërinë për të punuar nën drejtimin e Hansi Flick, duke besuar se stili i tij i lojës përshtatet me filozofinë e presionit të lartë dhe tranzicioneve të shpejta.
Barcelona po e vlerëson këtë mundësi si një lëvizje potencialisht të favorshme në treg, me një kosto që pritet të jetë rreth 50 milionë euro.
Leao shquhet për shpejtësinë, depërtimet dhe aftësinë për të luajtur në disa pozicione në sulm, si në krahun e majtë ashtu edhe si qendërsulmues.
Ky fleksibilitet e bën atë një kandidat serioz për të mbuluar boshllëqet që mund të krijohen në repartin ofensiv, sidomos nëse konfirmohet largimi i Robert Lewandowskit dhe pas vendimit për të mos mbajtur Marcus Rashford, i cili pritet të rikthehet te Manchester United.
Në sezonin aktual, Leao ka regjistruar 10 gola dhe 3 asistime, duke mbetur një nga lojtarët më vendimtarë të Milanit.
Nga ana tjetër, klubi italian është i hapur për shitjen e tij për të siguruar fonde për rindërtim.
Operacioni mbetet në fazë analizash financiare për shkak të kufizimeve ekonomike të Barcelonës, por fakti që vetë lojtari ka shprehur dëshirën për transferim dhe është i gatshëm të rishikojë kërkesat financiare, e bën këtë pistë më të realizueshme.
Vendimi përfundimtar pritet në javët e ardhshme, ndërsa Leao mbetet një nga opsionet më tërheqëse për përforcimin e sulmit katalanas. /Telegrafi/