Si masë parandaluese për përhapjen më të madhe të coronavirusit, në Itali është marrë vendim që të shtyhet Derby d’Italia ndërmjet Juventusit dhe Interit.
Dy rivalët e mëdhenj të kampionatit italian duhej të përballeshin të dielën mbrëma në Torino, mirëpo rreziku nga përhapja e virusit që ka shkaktuar mijëra të vdekur në gjithë botën (kryesisht në Kinë), i ka detyruar autoritetet italiane që t’i shtyjnë disa ndeshje.
Dhe data për zhvillimin e këtyre ndeshjeve, në mesin e tyre edhe derbit, është caktuar 13 maji (e mërkurë). Pas kësaj date do të mbesin edhe dy xhiro për t’u zhvilluar.
Java e 37-të e Serie A do të zhvillohet më 17 maj, kur Zonja e Vjetër do të luajë si mysafir i Cagliarit, ndërsa Nerazzurrët do ta presin në shtëpi Napoli.
Në javën e 38-të dhe të fundit që zhvillohet më 24 maj, Bianconerët janë nikoqirë të Romës, kurse zikaltrit udhëtojnë te Atalanta.
Nëse diferenca e pikëve do të jetë e ngushtë, atëherë Derby d’Italia do të jetë si një finale për titull. Por, nuk duhet harruar Lazion që në rast fitoreje ndaj Bolognas do ta marrë kreun e tabelës dhe pritet të jetë konkurrent për Scudetto deri në fund të sezonit. /Telegrafi/