Kush do ta mendonte se ngjyra e këpucëve që deri pak kohë më parë e konsideronim të vjetruar do të kthehej si zgjedhja më e dëshiruar për kombinimet e përditshme me xhinse?
Elsa Hosk sapo e konfirmoi, asgjë nuk duket më bukur me xhinset blu sesa këpucët elegante në ngjyrë çokollatë-kafe.
Modelja suedeze Elsa Hosk, e njohur për ndjenjën e saj të pagabueshme të modës, tregoi se si duket një veshje vjeshte e thjeshtë, por shumë efektive. Në qendër të vëmendjes ishin xhinset me prerje të drejtë, ndërsa përshtypjen e fundit e ngriti përmes zgjedhjes së një ngjyre këpucësh që është rikthyer fuqishëm.
Elsa Hosk u shfaq në Los Angeles me një kombinim që bashkon komoditetin dhe luksin, duke dhënë një këshillë të qartë mode: me xhinset blu përshtaten më së miri këpucët në një nuancë të kafenjtë. Ky është një trend që është ringjallur, edhe pse deri vonë konsiderohej zgjedhje “e mërzitshme”.
Për këtë kombinim ajo kishte veshur një pallto leopard luksoze nga koleksioni Valentino Cruise 2026, ndërsa silueta glamuroze e palltos u zbut nga një bluzë vintage me Paja Patakun. Xhinset e drejta e plotësuan pamjen, duke i dhënë karakter më të relaksuar, ndërsa këpucët me takë të ultë ngjyrë kafe të The Row sollën elegancë pa teprim, transmeton Telegrafi.
Kjo nuancë kafeje po rezulton befasueshëm praktike: mjaftueshëm neutrale për përdorim të përditshëm, por më e ngrohtë se e zeza, ndaj edhe lidhet më natyrshëm me tonet blu të xhinseve. Për këtë arsye po shfaqet gjithnjë e më shpesh në kombinimet e përditshme, sidomos te blogeret nordike që preferojnë një pamje minimaliste, por të ngrohtë.
Përveç kësaj, këpucët kafe e ngrenë nivelin e çdo kombinimi të thjeshtë. Ndërsa e zeza nganjëherë duket strikte, e kafja sjell butësi dhe një karakter elegant, duke e bërë më të përshtatshme për sezonet e kalimit. Të kombinuara me xhinse të drejta ose pak të gjera, krijojnë një stil modern, të lehtë dhe shumë të përshtatshëm.
Pamjen e saj Hosk e plotësoi me një çantë xhinsi Valentino Garavani DeVain, duke treguar edhe një herë se xhinset mund të duken shumë moderne nëse kombinohet drejt. Çanta në këtë stil shërben si ura vizuale mes xhinsit të hapur dhe detajeve kafe më të errëta dhe pikërisht këto kombinime të balancuara janë trendi i kësaj vjeshte.
/Telegrafi/