Mes 60 dhe 80 për qind të popullsisë së Bashkimit Evropian deri më tani janë infektuar së paku një herë me COVID-19, sipas një vlerësimi të Komisionit Evropian për Shëndetësi.
"Vlerësohet se midis 60 dhe 80 për qind të popullsisë së BE-së të jetë infektuar me COVID-19", tha sot Komisionerja e Shëndetësisë, Stella Kyriakides.
Sipas Qendrës Evropiane për Kontrollin dhe Parandalimin e Sëmundjeve, rastet e raportuar deri më tani janë rreth 30 për qind, por nëse shtohen edhe rastet e paraportuara, numri rritet në rreth 350 milionë banorë, ose rreth 77 për qind e popullatës së BE-së.
Pasi u qetësua gjendja me pandeminë e coronavirusit, Komisioni u bëri thirrje shteteve anëtare të inkurajojnë vaksinimin e personave deri më tani të pavaksinuar, veçanërisht të fëmijëve.
“Po hyjmë në një fazë të re të pandemisë, duke kaluar nga gjendja e jashtëzakonshme në menaxhimin më të qëndrueshëm të COVID-19. Megjithatë, ne duhet të jemi vigjilentë. Numri i të infektuarve mbetet i lartë në BE dhe shumë njerëz vazhdojnë të vdesin nga coronavirusi. Për më tepër, variante të reja mund të shfaqen dhe të përhapen me shpejtësi”, tha presidentja e Komisionit Evropian, Ursula von der Leyen.
Theksojmë se në Kosovë deri më tani janë raportuar mbi 228 mijë raste me coronavirus ndërsa kanë vdekur 3138 persona.
Ndryshe, mbi 511 milionë njerëz janë infektuar me COBID-19 në botë gjersa kanë vdekur më shumë se 6.23 milionë pacientë. /Telegrafi/