Klubi italian Crotone, i cili garon në nivelin e tretë të futbollit (Serie C), është vendosur nën administrimin e gjykatës për një vit pasi policia zbuloi "prova të mjaftueshme" për infiltrim të përhapur të mafias, thanë prokurorët të martën,
Sipas The Guardian, vendimi do të thotë që klubi nga rajoni jugor i Kalabrisë, shtëpia e mafies së fuqishme 'Ndrangheta’, do të vazhdojë aktivitetet e tij sportive, por nën mbikëqyrjen e administratorëve të emëruar nga gjykata.
Është e rëndësishme të theksohet se vetë klubi nuk është nën hetim. Crotone, i cili luajti për herë të fundit në ligën e parë, Serie A, në sezonin 2020/2021, aktualisht është i shtati në grupin e tij në Serie C.
Klubi deklaroi se do të bashkëpunonte në mënyrë aktive me autoritetet gjyqësore.
"FC Crotone do të bashkëpunojë në mënyrë aktive me administratorët e gjykatës për të vazhduar aktivitetet e saj në interesin më të mirë të klubit, tifozëve dhe sportit në përgjithësi”, u tha fillimisht në deklaratë.
Ata theksuan gjithashtu se vendimi i gjykatës "nuk sugjeron aspak bashkëpunim ose pëlqim të heshtur nga ana e klubit, aksionarëve të tij ose menaxherëve dhe bashkëpunëtorëve të tij".
Një dekadë nën ndikimin e mafies
Zyra e prokurorit të Catanzaros tha se Crotone "i është nënshtruar, drejtpërdrejt ose të paktën tërthorazi, kushteve të frikësimit dhe nënshtrimit nga anëtarët e klaneve lokale 'Ndrangheta’ gjatë dekadës së fundit".
Mafia lokale është infiltruar në veçanti në bizneset e sigurimeve dhe shitjes së biletave, dhe qëllimi i administratës gjyqësore është t'i drejtojë aktivitetet ekonomike të klubit përsëri në një rrugë ligjore.
Infiltrimi i mafies në futbollin italian, duke përfshirë marrëveshjet fitimprurëse në mallrat e klubeve dhe shitjen e biletave, është një problem i njohur. Hetimet e fundit kanë synuar gjithashtu grupet ekstremiste të tifozëve në klubet kryesore si Interi dhe Milani, ndërsa më parë ishte edhe Juventusi. /Telegrafi/