Komisioni Qendror i Zgjedhjeve pritet që sot t’i shpallë rezultatet përfundimtare.
Edhe pse ishte paralajmëruar se shpallja e rezultateve përfundimtare mund të bëhej gjatë ditës së djeshme kjo nuk ka ndodhur.
Kryetarja e KQZ-së, Valdete Daka në një intervistë për televizionin publik është shprehur se sipas të gjitha informacioneve që i kanë nga QNR dhe Sekretariati, sot do të jenë në gjendje t’i shpallin rezultatet përfundimtare.
Shpallja e rezultateve do të bëhet nëse PZAP dhe Gjykata Supreme nuk kanë pranuar ankesa nga asnjë subjekt politik lidhur me rezultatet e numërimit të 1806 pakove të fletëvotimeve të ardhura nga diaspora të cilat ishin votat e fundit që u numëruan.
Pas shpalljes së rezultateve partitë dhe kandidatët sërish kanë të drejtë të ankohen në PZAP dhe Gjykatën Supreme, nëse dyshojnë se u është bërë padrejtësi./Telegrafi/